短片:
https://drive.google.com/file/d/...nM/view?usp=sharing
或
http://video.appledaily.com.hk/m...70503_fin_112_w.mp4
停售12年,2014年重售的新居屋現在陸續入伙,其中首日開售無人問津的元朗宏富苑已有市民收匙。資深驗樓師詹濟南「詹sir」上周三(4月26日)驗收一個實用434方呎單位,驗樓得分84分,遠勝2013年銷售居屋貨尾天水圍天頌苑。詹sir坦言,是驗樓以來,最高分的資助房屋。不過他補充,相信是工種少,少做少錯,容易做,梗係容易攞高分!
2014年政府復售居屋,是自2000年以來,首次重新推售,提供2160伙,包括5個屋苑,元朗宏富苑是其中之一。屋苑位於宏業西街20號,是一個工廠區,工業大廈林立,重型貨車穿梭往來。鄰近西鐵朗屏站,識行步程約10分鐘,因為若貼近大坑渠,會兜一個大圈,行不少冤枉路。屋苑在2015年揀樓首天,無人選購,已露端倪。
屋苑由兩座組成,提供229伙,實用面積434至443方呎,雖然沒有間房,但平面圖已初擬出兩房間隔。資深驗樓師詹濟南驗收一個單位,實用434方呎,業主2015年7月中以263.69萬元買入。
將價就貨,大廈正門選用鋁閘,有別於一般新樓的玻璃門。每層走廊寬敞,每戶不設鐵閘,坊間一度鐵閘連工包料,普遍4000元至5000元,惟此新居屋慳皮。
打開大門,一如當日所言,開門見廁,詹sir驗下廁所,來去水無問題,坐廁都穩陣,花灑無甩漏,惟不設屏障,花灑水會沿牆身滲到門框發霉。廚房選用瓷磚,僅一塊空心,算不馬虎。不過廚房洗衣機來去水喉全不貼心,來水位與去水位打對角,隨時要業主花費千幾二千蚊聘用水喉師傅駁長條喉。
不過以驗樓工種而言,詹sir大讚單位牆身油漆批盪質素,「好過青衣綠悠雅苑,甚至啟德煥然壹居!」而且地台選用自流平的批盪方法,平水相當好,業主就咁鋪木地板或磚瓷都可以。建議其他業主收樓時,想睇下自流平地台有無空心,不用敲打,如有空心,必見裂紋,而今次驗收這單位看不見。
全屋只是窗戶一處玻璃崩花及廚房一塊空心磚,計及部分大門及浴室門安裝未如理想,總分84分。詹sir稱,這是最高分的資助房屋。他相信是工種少,第一,地板少咗;第二,浴室無浴缸、雲石、假天花、櫃;第三,無廚櫃;來去喉外露,易裝;門,講真是,就咁掛上去,而私人樓的門選用靚木,要執,要釘窿。全屋只是批盪油漆、地台、瓷磚,容易做,梗係容易攞高分!分數不能與其他樓宇相比,因為簡單好多。不過比較對上一個居屋天水圍天頌苑,就好過天頌苑!假如詹sir是業主會否收貨?他回應:「我收貨!」
新居屋元朗宏富苑入伙,走廊寬敞。
戶戶無鐵閘。
大門對正廁所。
廁所必須裝浴簾,否則水氣浸霉門框。
單位電掣安排有啲騎呢,兩邊牆身均有裝電掣,教人如何擺床位。
玻璃崩花僅1處。
詹sir評單位為歷來最高評分資助房,但補充一句:「少做少錯,容易做,梗係容易攞高分!」
資料來源:蘋果日報