小心裝修公司 "揾食招" ...........必須留意
轉貼編
首先聲明，本人相信大部份裝修公司都是務實的。出"蠱惑"的害群之馬，只佔少數。
作為消費者，防人之心不可無。知多"奸人"的伎倆，絕對有益處。
全包宴
有公司提供所謂套餐服務，一個價包晒全屋傢俬。傳單上寫包客廳，飯廳，睡房，書房，娱樂房，工人房等等全部傢俬。睇落去好似好多 ，細心一想，我屋企得兩房一廳。咁娛樂房，工人房傢俬點計呀？........................好簡單，冇囉！你有間房先至有架。
又有公司話包所有到地傢俬 。咁吊櫃點計呀？....................好簡單，另計囉！
其實最好先將你想造傢俬列出，再俾人報價，再比較邊間款式靚，材料好，價錢抵。再作決定。
超筍價
有啲公司係報價時做手腳，報個價低到你唔信。客人見到實話：好抵！好抵！事實上，只要IQ高過60分嘅人都知，哩個世界係冇鴿乸嘅！人人報二三十萬，有間報十萬話做到，作為消費者，我就唔會瞌埋眼簽囉！我亦唔敢話人哋一定係呃人，但係我會好小心咁考慮囉！
君不見電視機晚晚都有啲廣告話俾幾百蚊就擔保可以減十幾二十磅咩？！
落單先啦！落訂先啦！
未落單前，乜都話得。顏色，質料等等都任你改。一落左單，即刻冇得改，加塊層板又話要加錢，改做櫃桶又話要加錢，又叫你換隻好D既門較 ，又要加錢。總之就係要加錢啦！
又可能話俾你聽，好多人落左單，你都快D落單啦 ，唔係就冇貨架！......................係真唔係呀！
又可能同你講，不如落左訂先，公司規矩，要落左訂先可以出圖咕。如果D圖真係唔得既話 ，咪用訂金去換其他傢俬囉！........................點解你D裝修公司硬係要人買,未知件貨係點就要人落訂。
切記！落單，落訂是最後一個程序。呢個程序之前，你必需已經清楚看過效果圖，了解價錢包括甚麼，用料是甚麼，並要清楚列明於報價單上。
切忌草率，心急。
本店採用進口材料
應該係話，採用少部份進口材料，大陸加工，大陸生產，大陸裝嵌，現場"收口"(即擺好位置並執靚)。首先，本人並無扁低大陸產品的意圖 。相反，有些大陸產品的質量絕不比外國貨遜色，價錢絕對超值。本人只想指出有些公司採用嘩眾取寵的推銷手法，企圖引導顧客以為貨品真的是百分百進口貨，從而大幅提高價錢。
想見識真進口貨，不妨去各大名店或著名高級品牌傢俱店睇睇。兩三萬蚊一張梳化 。一組櫃三五七萬閒閒。
老實講，一分錢，一分貨，幾千蚊造個櫃。人家又要俾租，又要出糧俾伙記，又要燈油火立，又要養妻活兒，仲要人地俾埋歐洲進口材料？...............你無嘢係嘛！
提早付清餘款
有些公司未開工，便要求客先付工程總額的大部份作為訂金。客人一旦繳付，基本上完全變成被動，毫無討價還價能力，工程進度任由裝修公司操縱。更有一少撮騙徒，刻意把工程額降至五萬元以下，然後游說客人先付三至四萬作為訂金，客人一旦不慎付款，騙徒馬上逃之夭夭。由於五萬元以下屬小額錢債，追討較為麻煩。騙徒就是看準這點，四出搵食。一般工程訂金，不應超過總額的30%。
又有些公司在工程完成得八八九九時，便要求顧客付清餘款。要求付款時必然低聲下氣，諸多理由。到你一時心軟，付清餘款後。馬上粗製濫造，匆匆起貨 。到你稍有微言，立刻大聲夾惡。甚至聯絡不上，人間蒸發。
付款期和款額應在合約裏面訂明。不應隨便更改。合約應訂明保固金額，以保障顧客利益。保固金通常為工程額的5%至10%，視乎工程額多少。裝修公司須在完工後將所有瑕疵執妥 ，顧客才應放款。
