趁AC將帥不和出手搶人
曼聯8億撬卡卡打造K王朝
20/04/2009
AC米蘭之寶卡卡近日批評球隊係老人院，惹來練安察洛堤罕有公開斥責，英國《世界新聞報》就大爆，紅魔知道卡卡滿腹牢騷，經已秘密制訂「K計劃」，假如C朗今夏真係扭計跳槽皇馬，佢會即刻啟動緊急措施，開價七千萬鎊（約八億港元）收購球技、星味都同C朗有得揮卡卡，擔任新生招牌打造「K王朝」！
經歷「電話門」AC，明顯失去昔日霸氣，日前卡卡就公開暗示，紅黑兵團搵埋太多過氣球員，成間老人院咁，矛頭直指舒夫真高、碧咸、森保達，仲話要買球員就應收購利物浦隊長謝拉特，形容AC王朝已玩完，需要徹底換血，激到練安察洛堤生蝦咁跳：「只有當班主貝魯斯干尼離開，AC至會作出全盤改變。」
卡卡踩AC老人院安帥黑面
平日勁錫卡卡安察洛堤，甚至嬲到失控喪鬧對方：「卡卡有權表達佢意見，不過，佢咁講真係抵鬧。任何換血行動都有個過程，我唔認為AC年代已經終結。」作為巴西國家隊進攻靈魂，假如C朗堅持要轉會到皇馬，卡卡的確有資格頂替佢曼聯位置，而事實上，曼聯高層早就諗過行呢條路。
傳今夏賣C朗簽埋列貝利
據紅魔內部人士話，領隊費格遜已有心理準備放走C朗：「C朗想走係公開秘密，所有曼聯人都知，費Sir或者要接受呢個事實。」其實要費Sir妥協又唔係冇可能，因為「K計劃」除用七千萬鎊收購卡卡，仲包括羅致拜仁球星列貝利同韋根中場路爾斯華倫西亞，假如成事，到時曼聯整體實力可能仲勁！
再者，曼聯一向都鍾意同皇馬做生意，過去碧咸、雲尼斯達萊、軒斯都曾經係曼聯核心成員，最終都被賣豬仔送到銀河艦隊，更何況C朗偶像費高，當年都試過由巴塞隆拿轉會到死對頭皇馬，照計C朗都希望有朝一日登陸巴拿貝球場，假如曼聯能夠將佢賣到個好價錢，世紀交易可能今夏爆發。
http://football.on.cc/football/new/20090420/fbnewc0101x0.html
