其實安基苑係無區議會, 因為有事都係自己搵政府部門反映.
如果住安基苑向街市既居民, 夜晚9點至1點幾, 你都會聽到街市熟食中心, 牛下合利洗碗碟既嘈吵聲音, 玻璃與玻璃之間碰撞聲, 的確擾人睡夢.
去年1月9號我EMAIL
frankie@dab.org.hk, 响顏議員反映, 對方只回覆我,
"食環署回覆了我：
1. 已張貼不准喧嘩的告示
2.已提醒檔主要減少洗碗的嘈音
3.研究增設隔音屏的可行性
我們繼續看看情況如何發展，請您亦幫忙留意嘈音情況有否改善，謝！
顏汶羽"
"書面或見面報告都無問題.
等候你的回音,,,, "
結果我會見過議員, 只係之後見到佢助選立法會. 我曾經响街市管理員反映, 無用. 我亦曾經見過有街坊用相機映低對方電話, 直接向店主投訴, 可惜有咩用. 遇上周末周日, 酒客鬧事大叫, 仲嘈. 報警唔會受理.
唔明白, 貼近民居既熟食中心, 營業時間一定要到凌晨2點嗎?
之後响議員反映有邊青深夜走上街市3樓追逐, 要求鎖上街市通往3樓既樓梯, 但議員無覆我EMAIL了, 可能我太煩, 以後遇上同樣事, 我已自行去報警. 警察仲NICE, 同你講,
我都明白你情況, 不過嘈音唔係我地管到, 你要搵街市反映.
參選時, 我見過顏議員, 派我愛HK 戲票; 當選至今, 我只能响安基苑B座對出既BANNER見到議員肖像, 要求政府俾錢為街市裝冷氣, 但嘈音無控制唔到.
順發菜檔每天霸佔行人路賣菜, 由不足50呎面積, "擴充至200呎" 地方, 我同街坊不時致電食環署投訴, 但又如何?
佐敦谷道巴士站有高樹樹枝快掉下, 有無議員知道? 結果我打去食環署. 我知道唔少街坊自己打去警署, 食環署反映違例泊車, 阻街問題.
近月留心區議員的工作, 原來已衝出區議會, 去反映全港性議題, 地鐵加價, 電費加價, 通脹. CY曰: 民生無小事, 但小事誰來管? 答案是自己.
2013 年月曆, 亦要人去彩盈苑自取, 月曆其實唔值多少, 但心意更重要.
有時見到某立法會議員街上檔聆聽市民意見, 又行過隔離燕子樓, 見到黃議員, 不斷告示提醒注意樹上枯枝, 監察爆水渠等區內民生"小事", 我又反思, 其實呢區係咪已經無問題?
希望有其他安基苑居民, 可以團結起來, 互勉互助.
街市熟食中心嘈音問題, 短時間解決唔到, 但希望大家抵制合利, 無人食, 就無碗洗!
