大澳龍田邨變死城,其實不無因由。原本一家三口租住沙田私人屋苑的蔡太,因業主不斷加租,遂參加特快公屋編配計劃,兩年前搬入大澳龍田邨天寧樓一個400呎單位,月租千多元,可是入住後始發覺「大鑊」。
街市只有一檔兼賣菜肉
蔡太直言,搬入大澳猶如斷六親,交通極為不便,「尤其假日,好多遊客,巴士站打晒蛇餅,出去要等兩、三個鐘」。她希望政府可以為他們做一個居民證,只要出示證件便可優先上巴士。雖然夫婦二人已退休,可減少外出,但任職社工助理、在黃大仙上班的兒子,卻因路程遙遠兼車費太貴,只能周圍投靠朋友,「返工來回要40蚊,晨早5點幾要出門口,所以惟有喺出面周圍黐人瞓,放假先可以返屋企」。
而住在同層的謝太同樣排「快線」於兩年前遷入,她跟丈夫和兒子搬來後,自己在寶蓮寺找到工作,兒子則在大澳讀小學,丈夫做散工,最大問題反而是「食」,「最慘係買餸,呢度街市得一檔賣菜同豬肉,下晝想買嚿肉都冇,價錢仲要貴過出面(巿區)。」她惟有趁放假到東涌街市,買一整個星期的餸菜。
雖然很多人嫌龍田邨隔涉,但謝太寧棄屯門揀大澳,「房署最初畀屯門我哋,但嗰度好嘈,我哋寧願搬嚟大澳」。她相信政府只要改善大澳配套,便可吸引急候公屋的市民遷入︰「呢度空氣好,治安又好,只要開多間超級市場,同加多條巴士線,已經好好。」
http://hk.apple.nextmedia.com/news/art/20121212/18098705