漏報銀行戶口問題

SukiLEUNG2022

漏報銀行戶口問題

見完主任後，發現漏報咗一個十幾年前開嘅銀行戶口。（應該無咩錢，最多幾百元，卡/簿仔/戶口號碼咩都搵唔到。係今朝突然醒起有懷疑打去hotline問，銀行答我真係有戶口，不過check仔細就要去分行。）但星期六依家已趕唔到。
想問大家，如果真係check到有，我係咪要主動通知番主任？ 因為都肯定無咩金額，實唔會超額。

另外，我見面時冇要求要補交資料，係咪代表佢都覺得冇野要補充？有冇人知成個審查程序係點㗎？ 謝謝。

其實依家最擔心係有d好耐以前開嘅銀行戶口自己都唔記得，（即超過10年冇用過個d, 如果真係有而自己又唔記得左，可以點處理？ 驚房署話我有隱瞞，擔心。）

Lazybear

漏報銀行戶口一定要主動通知
審查主任當天只係初步收集文件，你唔講，主任當日唔會知申請人漏報文件，但收完文件先開始查申請人的銀行、保險資料，銀行戶口好容易查到。
漏報銀行戶口、保險文件，如果當年申請時及現在唔超資產限額的話，好彩只收一封警告信，唔好彩就直頭dq
樓主星期一立即聯絡返主任問可否補交銀行文件

kelly110

回應 #1 SukiLEUNG2022

所以有人會逐間銀行check自己是否有戶口!見主任审查時報仲有得救,审查後就大件事啦!我都答唔到你!最好問房委會啦!打電話或上樂富1號櫃台直接問职員查詢!可大可細,週一即刻問啦!

SukiLEUNG2022

好，我個2日就係屋企mark晒自己有機會用過既銀行，星期一早上逐間check, 下午聯絡番主任補，希望可以啦。

牛28

回應 #1 SukiLEUNG2022

盡快主動通知主任，主動通知同被主任查到係完全两種結果，審查主任只係初步判斷工資、資產合唔合格，之後主任仲要將你資料交俾上級作各樣嚴格審查，包括銀行、保險、田土廰……等，有銀行户口（不論有幾多錢）唔報被查到會立馬DQ，主動上報話俾主任聽太耐唔記得，應該叫你補交了事。

kelly110

回應 #4 SukiLEUNG2022

第一時間通知及申請補番好大可能會俾機會!如果是房委自己查出的就好麻煩啦!??祝:順利!

Sam2020

直接去取消賬戶最好

SukiLEUNG2022

但我已經見左主任，依家取消仲得唔得？剛見完去取消會唔會更覺我隱瞞？

配房組

十幾年前的戶口, 無進支活動十幾年, 都比銀行凍結左啦  
分分鐘每年扣手續費都扣哂$

SukiLEUNG2022

我今早打去銀行問, 佢都同我講未郁過12個月就涷。同埋我都已肯定係冇咩錢（銀行電話唔會答balance）

依家考慮緊問題係星期一去銀行（1）print番個結餘同主任自首；（2）直接去銀行取消戶口，唔通知主任；（3）去取消戶口，但通知主任。

我係上星期三見主任，到下星期一都只係2個working day, 唔知主任去銀行check左未，好頭痕。