白居二經驗分享

楊管

白居二經驗分享

小妹早年用白居二買未補價居屋做業主…見到白居二2022派彩無耐…心諗大家可能都研究緊…所以想喺呢度同大家分享吓當年買樓嘅心路歷程。

1. 申領購買資格證明書
當年中籤之後收到信…就向房委會交入息及資產申報表､稅單､糧單等文件。隔左一輪就收到確認書…然後向房委會申領購買資格證明書

2. 揾樓
一開波諗定首期有幾多、想做幾多成按揭…有啲舊居屋未必做到9成、25年還款期…唔好見平就衝去買。我當年係上網爬文…再打去啲按揭轉介confirm吓…心水樓盤可以做幾成按…幾多年…不妨問埋邊間銀行按揭Plan抵啲…反正唔駛錢
度好想要嘅面積、售價、樓齡之後…我就上地產網名同落區揾盤。合眼緣就去睇樓…唔好怕麻煩…再周圍實地考察吓…睇睇衣食住行方唔方便…除咗間屋啱唔啱心水…附近環境都好重要。我睇咗幾間之後就扑鎚。

3. 揾律師樓
問清楚你個代表律師可唔可以做白居二買賣…律師收費同其他雜費幾多等。

4. 簽臨約
睇啱傾好價錢…就可以簽臨時買賣合約…我嗰時俾咗5%樓價做細訂。記得合約唔好填錯野…檢查多幾次內容…簽名有冇甩漏。有錯嘅話房委會會彈回頭…到時要改返…就費時失事。

5. 申請按揭
簽完臨約就可以去銀行申請按揭…主要都係比較按揭利率同現金回贈。你可以自己逐間格價…又或者揾按揭中介幫手。我嗰陣係揾中介搞…唔駛收錢仲有額外現金回贈…大家可以研究吓。

6. 申請提名信✉️
簽完臨約…律師樓會幫你向房委會申請提名信…大約等咗個幾星期就收到信。

7. 收到提名信…簽正式買賣合約✒️
由簽臨約到簽正式合約…大約隔咗14日…簽正式合約嗰時俾埋大訂…大細訂加埋大約樓價一成…律師樓幫我交埋印花稅。之後…律師會幫你仔細檢查個盤有冇問題…做埋按揭契等。

8. 驗多次樓
成交前一星期…我上咗去單位仔細睇多次樓…可以上網下載份驗樓清單…有咩問題記得要提出…否則簽咗樓契就代表買入現狀嘅物業…事後無得再向賣家追究。

9. 成交日…上律師樓簽轉讓契
搞完一大輪終於入直路…簽完正式合約之後…過咗兩個幾月…期內搞掂埋按揭申請…就簽署轉讓契成交。當日要找埋樓價尾數､代理佣金…之後收埋物業鎖匙就大功告成！

小貼士係買樓切忌心急…派彩一開頭一定好多人爭住買…驚走寶…結果搶貴晒…用到差唔多私樓價買樓齡唔細嘅二手居屋…自住就無話唔抵嘅…不過當知道隔離左右都買平自己好多…就會多少有啲心理唔平衡囉...
同時都提提大家預留足夠金錢去搞裝修…量力而為…搵個信得過嘅師傅…否則幾時買返黎都會喊三聲...

最後都希望大家順順利利買到心水單位！
（代發帖）

RacRac2

多謝分享,寶貴經驗。

marst

回應 #1 楊管

遇到個好師傅同找個理想盤一樣咁難

Gaoyan681011

早hi

Thx

futsho

kaka_tsui2003

wtk7213

高腳七

siusunsun11