收鎖匙實錄

盈富街坊

收鎖匙實錄

首先喺度要多謝灣仔小子, 卓&其他俾過意見我嘅街坊, 同埋唔好意思咁夜先出呢個post
今日最後都可以同屋企人順利準時去迎接收鎖匙呢個重要時刻, 同大家分享下收鎖匙嘅情況
1. 9:00 已經有大約十幾戶排隊準備等9:15登記 (每日都有3個時段做登記, 包括9:15, 11:00 & 2:15, 而今日9:15呢批包括我都係收到房署出信嘅一班人, 因為除左有房署出信外, 另外就係好似灣仔小子咁收到由物業管理公司出嘅信)
2. 9:30 開始check同收鎖匙一齊寄黎嗰份表 (大家記住要填好先, 尤其最緊要係最後要簽名嗰頁, 18歲以上唔去收鎖匙嘅屋企人一定記住要簽好, 但係18歲以下另計, 因為18歲以下會係家長代簽, 不過如果大家有小朋友可以留返去到先再問職員都得)
3. 9:35 再去排隊攞籌
4. 9:40 開始放人入去聽屋邨簡介, 只限戶主不過可以同多一個屋企人入去 (今日9:15呢個時間大約做25戶, 不過有兩戶未到, 聽d職員講將佢地改下一個時段, 而且要等齊同一時段嘅人先開始)
5. 10:00 開始睇片 (簡介內容大約20分鐘介紹返條邨嘅野, 同埋之後睇樓要留意嘅事項)
6. 10:20 開始分批上去睇樓 (職員會分樓層, 例如有兩戶34樓再加一戶37樓咁呢三戶就一齊上樓, 睇完樓簽約之前會開個水錶, 大家留意下個度數係唔係0, 因為要証明你未簽約之前係冇用過水)
7. 10:35 等簽約 (其實睇樓都冇話有冇限時, 只不過睇得啱簽咗約再慢慢攪都未遲)
8. 10:40 開始講解簽約 (都係只限戶主不過可以同多一個屋企人入去喺度唔多解釋, 不過要留意嘅係, 今日我簽約嘅時候係同一幢樓嘅人一齊簽約, 呢個時候戶主要準備定兩張相for租約)
9. 11:40 最後係 i)交租 ii)交泥頭費 iii)攞智能咭及攬臨時住戶証(呢個時候要準備所有同住屋企人嘅相) iv)今日最重嘅一環'收鎖匙' (大家記住次序去做)
10. 11:45 完成所有程序

盈富街坊

另外有d資料可以補充俾各位:
有關八月免租一事本來應承各位問, 但係今朝簽約時太混亂, 所以未能有一個肯定嘅答案俾大家, 因為我今日收工再去問過, 但係答案係冇綾兩可, 個職員話我地太係呢兩個月簽約比較'鑑介'遲d房署可能會諗辦法免返八月嘅租俾我地, 不過如果有街坊去簽約嘅時候可以代其他街坊再問多次
泥頭費有三種人可以豁免 i)全屋係老人家 ii)綜緩人仕 iii)傷殘人仕 (不過今日有人問如果自己裝修自己清走泥頭係咪可以唔俾, 所以大家簽約嗰陣可以再問多次)
今日聽d裝修佬講d大單位都係今日(2/7)先開始派
屋入面已經有有線嘅天線插頭, 唔知咁係咪代表我地條邨嘅天線係俾有線負責呢?
另外屋入面都已經有和記同hkbn嘅插頭
希望小弟呢d資料可以幫到就黎收樓嘅街坊啦, 未收到信嘅街坊都希望你地可以早日願望成真啦
盈富街坊

灣仔小子

你最後趕到，一世人一次既大事，恭喜晒！
好詳細，多謝分享！

灣仔小子

請問交租係咪一定要參加自動轉賬？我想自己去交得唔得？

bda

謝謝分享

☆水☆

  唔該哂你先AR....
有一個問題:
不過今日有人問如果自己裝修自己清走泥頭係咪可以唔俾, 所以大家簽約嗰陣可以再問多次<--- 請問你係咪聽唔到答案?
不過如果可以唔俾, D人果果都話自己做裝修...然後掉入垃圾房都冇人知LA...

哈哈笑^o^

wa..好詳細啊...辛苦晒 ..
&恭喜晒... ....
有個問題,,咁係咪大部份人都俾左"泥頭費"啊..

kento12125

多謝分享

poo_law

我想問全家人既相既意思係每位家庭成員既証件相/ 一張過全家幅?

盈富街坊

原帖由 灣仔小子 於 2008-7-3 05:29 發表
請問交租係咪一定要參加自動轉賬？我想自己去交得唔得？

唔係一定要參加自動轉賬, 不過會做自動轉賬嘅街坊請記得帶文件到攞鎖匙一帶攪埋