長文分析:駿洋1~3座住戶調配海達邨 大家話好唔好?
海達2300個單位將於年底分批入伙,係今年唯一可以一次過調配、安置晒所有駿洋1~3座住戶嘅機會。希望大家幫手諗諗可唔可行,推比房署落實。
因為呢個真係一個多贏少輸嘅解決方法
首先對駿洋人嚟講,可以喺海達相對如期2021年新年前入伙(工程其實都有延誤),點都好過再等1~3座,因為你永遠唔知道明年第二季初係咪可以入伙,政府一而再再而三玩弄準居民,實在無辦法接受。而且大家駿洋人若可在同一條邨守望相助,對大家將來生活點都有好處,可能鄰里關係會好啲,始終只有駿洋自己人知道駿洋人嘅苦。
對房署嚟講,一次過解決駿洋問題,點都好過無止境拖落去,而且手續一定比自選AB餐方便快捷,只需大致跟返每戶人數樓層安排便可。而且相信所有駿洋人入左伙,唔會再點嘈,房署之後可漸漸回復正常審查配房工作,雖然疫情點都有阻滯。
對擴巿後面排隊嘅家庭嚟講,大家都知未來3年係擴巿冰河時期,無新屋邨落成,定必有排排,除非轉區。所以急住上樓嘅之後可以快少少上樓,雖然又係唔知政府玩1~3座玩幾耐,但都好過等到2024年後。
對巿區隊嚟講,的而且確可以話唔係好公平,無端端多左千幾個號碼,少左個中奬機會。但要知道有部分駿洋1~3座住戶已達巿區配房編號,如果唔係政府之前拍晒心口話竹蒿灣起好(7~9月)駿洋一定歸還,可能嗰陣時就有人跳返巿區。另外未來一兩年巿區有過萬個巿區單位落成,唔少新界擴巿人都會考慮轉巿區,唔介意等多一兩年都要巿區。亦即係話無論有冇駿洋事件,一定會有人轉區,但因為無過去數據比較(轉區自由轉,計唔到數),講唔到今年比之前多左幾個人轉,所以公唔公平計唔到。但點都好,疫情原因所有排緊公屋嘅家庭多多少少都係遲左嘅,冇人想,希望可以理解。
對政府嚟講,簡直就係大贏家,一嚟駿洋可以無了期霸落去,為抗疫繼續作出不可替代嘅貢獻。二嚟唔使再比假承諾駿洋人,狼來了故仔都淨係可以呃兩次,再呃第三次已經冇人會信真心準時還。三嚟算係了結左駿洋事件,慳返6000蚊,少左個唔知算唔算嘅煩惱,齊心抗疫。
講真只要大家目標一致,以低成本高回報原則,用最簡單快捷方法拆掂壇嘢就最好啦。不眠之夜,有感而發,歡迎討論