房協翠嶺峰坐廁驚現滴屎水 業主呆咗「沖咗幾次滴得幾多吓!」
房協按市價七折發售的樓盤排隊交樓,繼沙田綠怡雅苑後,又有傑作。《蘋果驗樓》邀請驗樓師陳智康「康仔」及賴達明「明哥」分別驗收將軍澳翠嶺峰一個兩房及三房單位,結果康仔驗收兩房單位的廁所時驚現「屎之水滴」,坐廁排泄物排出室外的尾喉接駁位滴出黃色的、濁的、有味的水,即場測試,每撳水掣就滴水,來去水零分。明哥驗收3房單位,瓷磚及窗不及格,得78分。
康仔驗收翠嶺峰高層兩房單位,實用面積464方呎,業主YY去年初以427萬元買入。業主擔心漏水問題,就先去睇水。廁所洗手盆放出如泥水,康仔稱:「啱啱入伙,見到呢啲水有色係正常,如果覺得污糟,要等入晒伙,洗咗水缸先無問題。因為而家水缸仲係好多沙石,好容易沖落嚟。(入晒伙咪有排等?)都係,大約預個零兩個月。」旁邊坐廁貼有黃紙寫上「屎渠漏水」,是屎水嗎?康仔反問:「直頭係條屎渠下面有啲黃色嘅迹,咁你覺得係咪屎渠漏水呀?」他即場測試,每次撳坐廁水掣,都見到去水尾喉接駁位滴水,且有陣味。康仔解釋是接駁差所致,尤其是儲滿一缸水,沖得越多,滴得越多,認為發展商必須修理,否則每次沖廁都會滴水。分數方面,「每逢漏水都係扣大分!」而與廁所相對的廁房鋅盆去水喉接駁位同樣出現滲漏的情況,導致此單位來去水項目零分。
檢查露台趟門門鎖鬆緊是簡單工序卻做漏,且出現刮鎖問題,不過未致於整隻門更換,調較鎖位可以解決。不過對出露台就出現漏磚,雖然不會漏水,但無理由寧寧舍舍少一塊磚。單位油漆亦麻麻地,有凹有痕,主人房出現3塊空心磚,廚房門亦無法閂實,總結來去水及瓷磚兩項工種零分,另外門、窗都扣一半或以上分數,總分66分,連同今個單位,康仔驗收兩伙,對上一伙得70多分。
對於單位坐廁喉管滴屎水,業主YY回應:「我見到其實都呆咗,特別係呢啲時間。之後沖咗幾次廁其實都滴得幾多吓,房協呢啲位要多啲注意,呢啲衛生問題唔可以求其。」
另一個單位由明哥驗收,為實用面積684方呎3房單位,業主去年初以約570萬元買入。他發現單位近冷氣機外牆瓷磚掃口好多窿,密集如蜂巢,「本身係主力牆,漏水風險唔大,但望上去好多窿,好難睇。最擔心雨水滲入,令瓷磚有剝落風險。」客廁坐廁閂掣佈滿綠色銹迹,過往好多爆水喉原因在此手掣生鏽損毀所致,現場扭動,暫時開關正常。主人房有兩大問題,橫樑內不是木板,而是油漆批盪,但都敲到「撲撲」聲,空鼓面積大過1平方呎。另外玻璃窗有3粒崩及1個氣泡,爆破風險高。明哥指,單位有9塊空心磚,其中主人房浴室有5塊。總結單位瓷磚、窗扣分最多,屬不及格,由於單位面積大,評分系數較細單位不同,單位得分78分。
房協回應,項目建築師的工程監督會就施工進行監督,並於交樓前再進行詳細檢查及驗收。該會專業團隊亦就交樓進行驗收。為讓業主有充足時間提出修繕項目,安排半年修繕期。在收到修繕申報後,一般21日內完成。上述兩個單位已收到修繕申報表。對於出現滴屎水的單位,房協回應,該單位的執修工程將於日內展開。