有得入伙當然開心，因為已經有基本裝修，諗住唔好浪費，住幾年，等自己知道想點樣裝修先去搵人裝修。買好洗衣機同傢俬就搬入去住，間屋整體算OK，無咩要執，要執嘅都無咁快，不過住入去先至發現起樓設計嘅，整好多嘢出嚟笑死人。第一樣好笑係，個浴室櫃上面裝嘅廁紙座，淺到無朋友，只有酒店俾客人用嘅卷裝廁紙可以裝得落，家用嘅唔好諗啦！裝上去你都拉唔郁。另外，個原裝花洒龍頭一定要換，出水細到個熱水爐出高溫熱水，點較都唔出適合嘅水溫，問煤氣公司，佢個客戶服務第一個就話新樓新機好難出問題，建議換咗個花洒龍頭睇吓，果然有效!所以提醒大家，一定要換咗個花洒龍頭，出水少唔係水壓問題。最後，個沖涼水龍頭轉花洒粒"的"，開住熱水係好難拉高轉花洒嘅，一定要兩手操作，一隻手拉住粒"的"，另一隻手去開水，咁先至成功用到花洒。其實，撇開呢啲用錢解決到嘅問題，環境係幾靚幾舒服，通常環境好就要犧牲生活上嘅方便。買嘢食嘢真係好遠，行親都超過5分鐘，有老人家就辛苦啦！要上斜落斜。因此，建議一次過買多啲食物，買個大啲嘅雪櫃，儲定啲糧。最後好重要，如果對煮食有要求，奉勸將煮食爐換咗佢，因為火力真係好細，同埋換埋個抽油煙機，因為真係好無力，不過無飯夫妻就可以……啦！
