呢個帖應該係5個租金帖入面最多字嘅，主要係因為要對比4邨，慢慢睇(今次粗體佐一d我覺得重要嘅資料，對比個part除外)我去查房處d文件，睇到有2個文件講到白田租金同埋面積，就share下。(呢三期嘅面積同租金係一模一樣，所以就唔寫3次)
白田7,8,11期各類型單位面積同租金(注：租金係加埋差餉嘅所以真正嘅租金可能會有少少唔同，僅供參考)：
A(1-2人)面積：14.05平方米，租金：1200元
B(2-3人)面積：21.44平方米，租金：1830元
C(3-4人)面積：30.15平方米，租金：2580元
D(4-5人)面積：36.14平方米，租金：3090元
對比文件中四個差唔多同嘅期海榮富暉漁進同匯智單位面積：
1-2人單位：面積同海榮富暉一樣大，匯智細個款都係同樣大細，但係大個款大0.45平方米，漁進細個款細佢0.04平方米，大個款就大幅度多過其他3邨。
2-3人單位：4個都差唔多，排名嘅話就順序匯智第一，漁進海榮並列第二，富暉第三，白田係包尾。
3-4人單位：面積又係包尾，縮水第一無疑，其他嘅話中規中矩，漁進最細個款都仲大過白田，漁進中大款算係叫大嘅，匯智大細兩款都係漁進中大兩款之間，海榮就介乎于漁進匯智細款之間，而富暉呢以dd大的差距唔係尾一。
4-5人單位：全部入面只有白田有36平方以上(匯智最大個款差小小就36咯)，其他係4-5人度縮得太嚴重咯。先講海達，大個款算係有35.9平方米，但係細個款實在縮得好嚴重比富暉仲細。跟住講漁進，大細面積唔係好大，35同35.15真係分別唔大嘅，但係都係縮佐。匯智稍微好d，大細兩款都算有35.6以上嘅。最後係富輝，面積再縮就包尾啦，如果冇海榮墊底就真係縮水皇。
對比之後嘅縮水樓感想(富暉漁進海榮)：今次真係有d意外，富暉毫無意外縮水皇啦，係1-2人單位同其他差唔多，其他都係縮，睇d相明明覺得佢起碼冇咁縮啊，點知呢。。。縮水嚴重。海榮第二縮，冇野好講，算係比富暉好d水，部分跟漁進差唔多，宜家新起d市區樓真係除佐縮就真係冇野講。漁進overall係面積比較驚喜到我嘅，未搵資料前我係覺得會冇咁大，結果對比完係比較大嘅一個，大嘅款嘅1-2人單位有成16平方米，然後其他單位都算冇咁縮水咯。
對比之後嘅縮水樓感想(重建嘅白田匯智)：因為匯智同樣都係大部分單位預留佐俾重建戶，所以就單獨比較。我就覺得白田係1-2同3-4人單位縮水比較嚴重，但係2-3人單位比較正常，4-5人單位仲有36平方米算好個，我覺得有可能因為白田多4-5人同埋2-3人單位，所以縮水唔嚴重？講翻匯智啦，匯智只有2-3人單位冇兩款，有兩款嘅類型面積上比白田大dd，4-5人稍微遜色d。所以單獨對比嘅話我就覺得兩個縮水差唔多。
總結：基於上面嘅對比，我覺得白田除佐4-5人單位同1-2人單位之外，其他都縮得好嚴重下，2-3同3-4嘅面積仲係包尾，同富暉縮水程度差唔多咋窩。
