喺8月16日收到房署嘅派屋信…本來話8月21日睇樓簽約…點知佢8月17日打電話俾我問意向…我緊係話暫時決定要個單位…但係要等睇完樓先作最後決定…跟著個主任就話21號唔使黎…等裝修完先有得睇…最後要等到9月中先收樓兼簽約。
簽約時就即刻同主任講有意買入…但係佢回答係要起租計一個月後先可以申請購買…所以等到裝修完…佢地影晒相…10月27日接到房署通知…約左10月30日去簽購買申請…順便交埋$2500首期。真係過左一個月？
簽完申請表交左錢…記得攞收據…果日我on ix ix 咁冇攞…去到銀行申請貸款時個職員問我攞收據先記得無攞收據。
11月6日係信箱收到正式批准購買信…就即刻攞去銀行俾佢影印交上去批核組。
係11月12日收到銀行批准嘅電話…跟住就即時打去劉漢X律師樓約時間做買賣合約…過左幾日律師樓打電話黎話11月21日會收到信…依照個日期上去簽約就得。信中已經計晒所有費用！
卒之係11月27日叫老豆帶支票簿去簽約…費用係$54xx。
重要帶身分證、地址證明、就業證明等等！
過程當中仲要簽宣誓紙…講明自己無物業和首次購買物業(喺香港？)…仲講解埋轉名要收正常價錢手續費…即係當時你個單位既市價…唔係房署既估價。而且仲係要過3年先可以賣出或轉名！
律師仲話會係11月29日完成購買…下個月29日就要開始供樓。
最後…係12月2日就收到律師樓封信…叫我去房署攞正式收據…同埋去管理處交管理費按金同月費。
總結：
整個購買過程大約係2個半月內完成…成功由租客變成業主。供樓既錢比租金多百零二百蚊…管理費$276。加加埋埋都係$1800有找…抵買？
最後在此多謝老豆老母呢年幾內嘅支持…先可以順順利利由上訴到派屋再到買樓…一年內由乜都冇…變成有個安樂窩。
