入伙分享--大陸訂傢私篇

ting3e

入伙分享--大陸訂傢私篇

傢俬篇
我諗有好多人都想係大陸訂傢俬，但又唔知道程序，又唔知點俾錢，點溝通，又驚做出黎唔靚
一開始我都有咁既疑問，但由於無乜錢既關係，都係照做左，效果都非常滿意
全屋傢俬包括︰C字櫃，電視櫃，廚房門頂吊櫃，大房4尺油壓床，兩個衣櫃，書枱，
細房三尺+兩尺半子母床，書枱，衣櫃，總數4萬港幣包送貨同安裝

首先要諗大約要做D咩傢俬，之後搵間比較有信譽D既鋪，CY到有兩間都係大陸做傢俬，
兩間我都有問過，一間度尺要俾500人仔訂金，度完尺之後遲遲都唔肯出初步圖俾我，係都要大陸搵佢，所以我無揀佢，
另一間免費度尺，而且佢個POST好多圖睇，態度又好，報價都OK就簡揀咗佢做
一開始先約左時間上黎度第一次尺，你要話佢知你想做D咩，如果你畫左圖，佢更加容易理解
度完尺之後佢會係微信群到整個初圖報個價俾你知，大約幾錢，如果你覺得OK就要先落$2000人仔訂金
俾錢有幾個方法，可以支付寶，微信，或者銀行過數，如果無大陸支付寶同微信可以用銀行過數
佢地有中國銀行戶口可以過數，如果要俾港幣就計返當日匯率就OK

之後就等間屋鋪好磚間好房之後再叫佢地上黎覆尺，覆尺之後佢地會再出圖俾你，寫清楚每件傢俬既尺寸
記得尺寸一定要度啱，之後就上佢地深圳公司到簡顏色，門柄，門較，簡好之後計埋個實數俾你
果時要再俾多50%訂金，佢地會開始生產，如果你唔想上去大陸，亦都可以叫佢地影相俾你簡
不過我個人唔太建議，始終點都有D出入，
要留意一點，焗漆，緩衝門較，暗門，香港師傅我果間都要加錢，
所以記得要問清收費，同埋可以同佢地講下價叫佢地俾個折頭，
我上去簡料，不主動講俾折，佢都俾左折頭我

大約一個月左右佢地就會做好，做好之後會叫工廠影一影相你睇，或者你可以去佢地廠到睇都得
佢地會車你過去，雖然我今次訂係無去睇，
但我覺得上去睇清楚度清楚會好D~廢事到左香港先發現有問題就好麻煩
如果無問題既話就俾埋尾數佢地，簡好日子就可以運過黎，你預收貨一日，安裝兩日
雖然有好多人都驚俾晒錢會唔會有問題無得追，但有時候只能講運氣，好彩哩間售後都好好
有問題都會即時處理，我有其他鄰居裝左7次都仲係有問題，好傪

傢私到左記得要點齊數，有問題即時同返大陸果邊講
佢地有三個師傅上黎幫我安裝，可能我地有俾利是同包飯既關係，原本要兩日先裝完，佢地一日就幫我地搞掂
由朝早10點搞到夜晚10點幾先走，裝完發現漏左一塊板，同埋修口板尺寸唔啱
同返大陸講，過幾日就寄返黎俾我地，另外如果需要填縫膠修邊要同安裝師傅講，佢地另外報價俾你
有問題麻煩留言我盡量解答，下篇淘寶篇見

抱歉！ 你無權閱覽或下載此留言的上傳圖片或文件｡
如果你已建立帳戶但未登入, 請按此登入｡
你未建立帳戶？ 請按此建立帳戶｡(完全免費)
建立帳戶後請按此重載本頁｡

running

謝謝樓主資訊，非常有用！

Eecheung

靚！好詳細

Ph

請問總數幾多人仔？

Mingchow27

emma502

Yolaivan

同我用同一間公司做??我用左8萬幾港幣。。上黎裝左六次先搞得掂 。。其實都仲有好多問題。。我自己搞返好?

DreamyKjm

fung凰

Lamsir

多謝樓主分享