大家好，經過6年既等待我終上到樓啦，我相信有好多人都同我一樣對裝修，訂家私，一竅不通多數都係上網搵資料，或者搵朋友介紹，我而家以過來人身份去同大家分享我今次既經驗
我會分三個POST去講解下，分別係︰裝修+電器篇，傢俬篇，淘寶篇有任何問題歡迎提出，我答到都會答
裝修
首先你要預返條數，裝修要幾多錢內，有條大數，咁就開始上網搵資料，我首先喺呢個討論區搵D廣告果D黎睇
因為果D公司多數都有做開公屋，亦都有完成圖，同埋比較多人有評價，咁會有信心D
簡啱心水公司之後，直接攞圖則去報價，你要話佢地知你想點做，要點間房，通常哩D公司都會包基本野
例如油油，鋪磚，間房。我簡果間公司佢有套餐價，包批灰，廚櫃，次櫃，假天花，浴屏等等，個價就11萬幾左右
我自己另外加間多一間房，裝浴室寶，抽氣扇，次所改巴士門，改/加電制位總數19個(裝修公司包6個)
我簡哩間公司既原因係，佢既好評比較多，價錢合理，俾錢方法好，可以分五期，每期完工搞好先俾錢，最緊要係手工好唔會爛尾
裝修前你要諗清楚間屋要點間，油咩油，千其唔好一路裝修一路改，咁樣大家都唔好做
另外裝修期間都要多D上去睇，一有問題要即時提出，等佢地幫你汁返好，如果到佢叫你檢查時你先去睇，發現有問題再叫佢執
咁就浪費左好多時間，重有就係，裝修公司會話你知大約幾耐完工，最好問清楚如果延期會有咩補償
電器
總數買左3萬左右，包括︰電視(KD-49X7000F)，雪櫃(RBG380P6XHL (黑色))，洗衣機(ZWSH7121VS)，
油煙機(PR-3033-S70)，浴室寶(30BGCH)，抽氣扇(15WUE07, 20AUH07)，窗口機(RA-10QF)，分體機(ASWG09JMCB)，
空氣清新機(小米)，風扇(CF-1308R)，焗爐(OF4448)，電飯煲(RC-10NMFIH)，吸塵機(XJC-B021 (米白色))，
Sound Bar(YAS-207)，熱水煲(小米)，煮食爐(TRTB62ST-G)，熱水爐(GIW-12N2(TG))
未裝修前我已經諗定要買咩電器，因為我係住我媽果到，所以全屋電器都要買過，
有個網站叫格價網，果個網係比較唔同公司賣既電器價錢，
我自己做左個EXCET表，列明要買咩電器，尺寸，價錢，鋪家資料
如果要係格價網買電器，買之前記得要問清楚運費，安裝費等等，因為佢地標既價係唔包運費，除非寫明包送貨
搵一間價錢最平既買就得，因為一定係行貨，有原廠保養，單據要KEEP好
有D鋪頭包安裝，有D唔包，記得一定要問清楚，費事到時大家淆就無謂啦
平時放假都會去周圍行下，睇下邊到做特價，如果平的話會買定先，就好似小米空氣清新機咁，咁啱等到佢有特價950蚊就入手
講住咁多先，下篇講家俬
