（頭盔：以下純粹為本人就現有資料、以及個人經驗和分析，就秀潤樓單位份佈情況所得出之估算，只供參考，參考者應自行判斷其可靠性，一切應以官方公佈，例如從房屋署或區議會所釋出的文件為準。如因本估算引起任何損失，本人概不負責）
首先參考一下秀潤樓原先嘅發展大綱，見到原先係打算起350個單位住980人，不過再睇吓近期區議會文件，發現只係起得322個單位，居住人數亦大幅縮水至667人，表示咗平面圖則可能有大改動過，雖然係咁，佢嘅位置同高度仍然值得參考。
喺發展大綱我哋可以睇到秀潤樓預定係起成兩翼V型咁樣，而住宅大樓高度係18層，由1/F至18/F，另外近曉光街一面係少咁一忽。雖然實際圖則可能有變，但係大致外型同樓宇高度可以改嘅空間不大。
之後睇睇一d近期起好嘅新樓各單位嘅外觀，呢個喺目測單位分佈入面好緊要。
話到明個則可能有大改動，咁就緊係要搵返個新嘅則出嚟先啦！所以下一步就係透過喺四周影到嘅相，畫返個大概嘅新則出嚟(四周嘅相可以睇返我尋晚出個po，其實我另外仲影咗廿幾張相冇upload到，喺呢步我可能有參考過嗰廿幾張相)。畫好之後就要睇返單位大窗(廳同房)、細窗(廚房廁所)、同埋其他樓層設施嘅窗(例如樓梯)嘅大約位置。
畫好之後，就可以用新則去間單位，並且參考其他近期新樓嘅外觀，分析每層單位分佈(當然可以直接用目測睇，不過我選擇畫新則嚟提高估算正確嘅機會並且等之後參考更加方便，而直接目測將會係之後嘅驗算方法)。得出每層有19個單位，8個一人、7個兩人、1個一房、3個兩房，一共17層有單位(1/F照慣例係不設單位)，總單位數量係323個。
不過官方數據係得322個單位，咁點解多咗個單位呢?記得發展大綱有提過2/F近曉光街係少咗一忽，於是睇返喺曉光街嗰邊影嘅相，數一數，發現的確喺2/F係少咗一個單位，再睇返前面嘅估算發現嗰個係2/3P單位。好啦，單位數目證實咗呢個估算喺呢一方面係可行嘅。
之後再用目測驗算單位位置，同之前畫嘅新則以及間單位方式吻合，證明前面嘅估算冇喺畫新則同間單位度出錯。(其實就算有錯都會喺呢步改返啱)
終於嚟到最後嘅驗算工序，就係透過每單位大約居住人數，計返呢個估算係咪合理。以2/3P同1B只會分別派比兩人同三人家庭計，呢兩種單位嘅平均居住人數分別會係2同3；1/2P單位雖然主要派比一人申請，但係參考信麗個情況，都有少量會派比兩人家庭，所以個平均居住人數會係介乎1至2，而且接近1；兩房單位就會同時派四人同五人家庭，所以個平均居住人數會係大約喺4同5中間。計完一輪可以出到住667人呢個數，再一次證明估算結果可行。
最後得出嘅結果就係1/2P單位136個、2/3P單位118個、1B單位17個、2B單位51個，總數符合官方文件嘅322個。
有時間試吓用其他新樓個則，合成一個秀潤樓層圖則出嚟。
型到跌渣 
