暑假流流長，想返大陸玩一日半日，最方便舒服當然是自己揸車，車主可以申請一次性過境牌照，不過規限多，而且配額已經要等到八月尾。咁不如返大陸租車揸，感覺好似危危地？我們就親身實試了一次。
現時較具規模的內地租車分別是一嗨及神州，據聞一嗨啲車就新淨少少，下載app後，必須用大陸電話註冊確認。之後就揀邊度攞車，分店選擇都多，羅湖口岸同皇崗仲要24小時營業。隨後就是揀車款，最平一日88元人民幣有交易，車款是國產車東風風神，想玩豪啲瑪莎拉蒂都有得租，我們就揀了一部韓國現代SUV，一日租金為246人仔，連保險、手續等費用，埋單計為446人仔。三日前租仲有優惠價，收費資料列明都相當清晰，不過提提大家一定要加錢選擇「不計免賠」，畀多數十元，萬一車身有甚麼損毀碰撞，連墊底費都唔使畀，因為在大陸揸車經常有碰撞風險。最後可以選擇去到門市才用支付寶或銀聯信用卡畀錢。
因為揀選了皇崗汽車城分店攞車，過了皇巴站一出關口就會見到車港城路牌，跟着方向上一樓再走過天橋就找到車港城，找到「一嗨租車」牌就找到舖仔，路程不算遠。入到櫃位交出租車三寶：回鄉證、中國駕駛執照及信用卡，再補填少少資料便可，手續不算複雜。不過要留意的就是必須帶信用卡，因為是要繳付六千元人民幣按金，當中有二千是違章按金，為暫留信用額（hold credit），不過數的。單據各方面亦寫得清清楚楚，如加油服務費、過時服務費等等。攞車前記得行一圈檢查車身有冇花痕，發現問題要即刻講，職員會用iPad拍照記錄，或對部車操作有問題亦可提出，四眼哥哥職員都好細心，解釋得好清楚，跟手記住睇埋尾廂暗格有冇收藏東西，安全至上。入車廂後第一件事要留意油缸是否入滿，我發現差一小格才滿，又影低一張相確認，還車入油後多除少補的，聲稱入多了會退錢畀你。
揸車方面唔算好大困難，但搵路就唔好靠Google Maps喇，出發前下載定高德導航及地圖，準確度都好高。見到道路收費站走藍色通道便可，由深圳去肇慶為例，路費大概要230人民幣。最後到還車，只要駛返去攞車的地方，入去叫職員出來接收便可，他便會兜一圈看看部車有冇問題，不過最重要是還車前記得要入油。接着回櫃位，他們會先退回四千元人民幣給你，另外二千元按金，一個月內他們確保沒有收到違規發票之後才解凍。總括第一次於大陸租車的經驗，感覺都算良好，因為網路系統甚完善，租車前不時收到訊息提你幾點取車、單據多少錢及幾點還車等，駕車又並非想像般困難。若然要去一些偏遠地方，我覺得租車是比搭公共交通工具好。意外收穫是一日後收到短訊，他們真的退回27元人民幣油費，不過只退回賬戶，只可留番下次租車用。
記者：許維雅
攝影：許先煜
歡樂香江
