建造業今個月起加薪，建造業總工會落實，建造業十六個工種平均加薪幅度由3.8%至13.6%不等，這次加薪預計可惠及廿五萬名工人。當中以天花間隔、紥鐵及模版的加幅最高，而紥鐵工人的建議日薪更升至約二千二百元。另外，各工種以混凝土工人工資最高，工會建議加薪8%後，日薪高達二千五百元。同時，為吸引年輕新血加入建造業，紥鐵等工種亦會一如以往，為員工提供三年加薪保證。建造業總工會理事長周聯僑表示，今年經濟不景，工程審批又被拖延，故薪金加幅較往年遜色，但仍高於通脹水平。
周聯僑透露，現時業界青黃不接問題嚴重，人手需求殷切，希望是次加薪能吸引新血入行，特別是大學生。「如果大學生有氣有力，應該放下架子，你喺出邊拼搏幾時先升到三四萬呢？但係你入嚟呢一行，你做兩年就一定過三四萬，而且你大學生，你唔係做郁手嗰個架嘛，兩年之後做老闆又得，做大管工又得，一定過三、四萬。」
不過，現年廿四歲、從事地盤工人兩年多的阿成直指，若新人想入行，根本不能以建造業總工會提出的建議日薪作準：「其實建造業呢一行好奇怪，可能大判（判頭）出嗰個價，就係所謂嘅工會價，即係二千幾蚊，但係經過唔知經過幾多級嘅判頭咁樣隊落嚟，可能得個千零蚊。」同時，做地盤收入不穩，若不幸遇上工傷，更是可悲。他分享道，有朋友是資深紥鐵工人，以前日賺千八元，但現在因為工傷只能當散工，日薪被下調至數百元一日。他苦心婆心地告誡，想入行的大學生「三思而行」：「即係我同你講搵兩千幾蚊一日，你就真係入行，其實你都真係有啲蠢囉講真，人講咩你就走去做。」
廿七歲的Terry同樣入行兩年多，以前從事地基工作，現在決定繼續進修，報讀建造業議會為期九十七天的紥鐵課程。他承認紥鐵的薪金的確比較吸引：「我之前喺地基度做，一日返十二個鐘講緊九百幾蚊，但係我係呢度返九個鐘，已經一千蚊起跳。」但是，他同樣不建議年輕大學生入行：「政府提倡呢行好容易做，其實真係會好辛苦。首先你要明白你喺太陽之下生曬九個鐘都已經會頂唔順，但係做紥鐵或者起大樓，你係喺鐵面上面行，講緊四十幾度，仲要不斷用力，其實係好多年輕人都會頂唔順。」
Terry又批評，政府對外宣傳指入行晉升機會多，實屬誘騙無知年輕人入行，因為在地盤工作，講的是人脈：「就算你好叻呀，紥鐵紥到識飛呀，你冇人事關係，人哋唔肯介紹你，人哋唔俾呢個數你，其實都冇得做。除非你話我老豆做紥鐵嘅，我老豆開公司嘅，咁你咪有得做囉……如果你話做一兩年可以開公司嘅，咁嗰啲師傅紥咗十幾年咪成層樓都起到，你諗都諗到啦，係呃啲無知嘅少年入去姐。」
記者：張馨文
攝錄：莫智謙
原來紥鐵高層先有2千蚊
本帖最後由 fung凰 於 2016-11-05 14:22:18 編輯
