裙褂繡吉蒂貓怕相沖？反肚龍吊腳褲唔老黎

傻

裙褂繡吉蒂貓怕相沖？反肚龍吊腳褲唔老黎

2016-10-27 09:11:00 HKT

玲玲師傅話卡通人物冇靈動力，大家可以放心着卡通褂喇。

因為阿囡嘅一句話，X師傅決心要設計Hello Kitty褂，認真喺廿四孝爸爸！

Vi首次擔任裙褂設計師，話之前冇諗過原來將Kitty放上褂喺咁有難度o架。

Hello Kitty裙褂系列一套四款，呢款行和風路線，別樹一格。

金銀線褂再加上水晶Kitty，好閃呀！

側襟設計令Kitty喺褂上出現嘅位置更有彈性。

舊版本嘅Kitty只用銀線繡上，後來設計師改用金線，再喺蝴蝶結加上日本布料同水晶，更Kitty更突出。

曾小姐自6歲起就係Kitty迷，直到o依家結婚都有Hello Kitty陪住出嫁，好彩未來老公李先生冇呷醋！

坊間盛傳裙褂水波腳代表有波折，師傅話其實應該解作圓滿先啱。

裙褂又叫龍鳳褂，龍鳳要一雙一對出現，千萬唔好反天，龍亦唔可以細過鳳。

師傅提醒準新娘，試褂時記得留意拉鍊位要順滑平坦。

裙邊要到腳背先合乎標準。

傻

本地裙褂店老字號鴻運繡莊，喺上個月首次推出Hello Kitty裙褂系列，有Kitty陪住出嫁，真係夠晒破格！Hello Kitty就話係貓，唔屬於十二生肖，但如果遲啲喺裙褂繡上布甸狗 、Melody等 ，又狗又有兔，怕唔怕同新娘子八字相沖呀？動新聞請來堪輿學家麥玲玲，仲有資深裙褂師傅黃國興同我哋破解裙褂禁忌同迷思。

對於將吉蒂貓繡上裙褂，玲玲師傅叫大家唔使擔心，「係玄學上嚟講，卡通人物始終冇靈動力， 唔需要介意，好似犯太歲嘅話，戴卡通公仔飾物都幫唔到，飾物要真係顯示到動物形象先有殺傷力！」但師傅話唔少人容易忽略穿着裙褂嘅禁忌，例如訂造裙褂千祈唔好造袋，因為有袋就代表袋走娘家或者夫家嘅錢。試褂唔會全套一齊試，多數會上下分開試；仲有新娘着裙褂前，記得要以紅色睡衣打底。

講到裙褂設計，其實傳統裙褂有唔少規限，偏偏鴻運繡莊X師傅鍾意打破傳統。點解師傅會萌生設計Hello Kitty裙褂嘅念頭呢？原來係因為一個人－－X師傅嘅囡囡！十幾年前，囡囡同師傅講，「我好鍾意Hello Kitty，你又話識造褂，咁我第日嫁會唔會有套好特別嘅褂呀？」就係咁，呢位爸爸將阿囡嘅說話放喺心上，去年付諸實行，同Sanrio公司接洽。對方對Hello Kitty裙褂構思非常受落，一拍即合，點知做落先知道原來一啲都唔容易！

Hello Kitty裙褂系列設計師Vi解釋，單係構思Kitty擺喺裙褂邊度已經好難：「傳統裙褂喺中間開（對襟設計），如果將一對Kitty放係褂上方，就變咗副眼鏡；放下面又會變咗兩個袋。」最後佢哋就諗到側襟設計，令Kitty唔使畀拉鍊割開。X師傅仲話，繡Kitty嘅針法同繡傳統圖案嘅方法好唔同，國內刺繡師傅都花咗好多時間，重新研究點樣繡一個合乎官方嚴格標準嘅靚靚Kitty。

由設計、配色到研究刺繡方法，團隊足足準備咗九個月，推出一套四款嘅Hello Kitty裙褂系列。啲褂靚到連未定婚期嘅曾小姐，都要豪洗近四萬蚊，買定等嫁！曾小姐話最鍾意系列中和風味最濃嘅裙褂，裙腳有Bling Bling水晶之餘，上身褂邊仲有蕾絲點綴，唔會老土。問到佢覺得價錢如何，佢就話：「第一吓見到個價錢都冇諗住買，不過佢（未婚夫）話見我鍾意，咁就買啦。」好彩未來老公李先生話唔肉痛，「我覺得自己地位比Kitty高少少嘅，鍾意嘅嘢好難講，我覺得OK。」

擺隻貓貓上裙褂話唔介意，但係有啲習俗，各位準新郎新娘都要注意！X師傅提醒，新娘着裙褂時，裙邊一定要到腳面。而裙褂、馬褂上嘅龍唔可以反天，既唔美觀又唔合乎傳統；褂上如果有龍鳳，就要一雙一對，龍亦唔應該細過鳳。坊間有唔少關於裙褂嘅傳言，但師傅就話有啲講法並唔正確，例如話裙褂衫腳要平，代表婚姻路平坦，水波腳就有波折，師傅話其實荷花邊解圓滿，波浪係指褂上嘅拉鍊位，「拉鍊位千祈唔可以手工差，如果彎彎曲曲，意頭就唔太好。」又有人話褂只可以出嫁嗰日着一次，到晚上唔好再着第二次，師傅話以前褂係飲衫，擺酒可以着、斟茶又可以着，甚至新年着都冇問題，最緊要你鍾意。

其實着裙褂出嫁係喜慶之事，跟足傳統都係想攞個好意頭，無需過分介意，最緊要大家開心！

採訪：何宛珊(表妹)攝影：馮峰、Neo後期：Roy編審：Kaman、仙

Horribleellis

fan府

carriewwf

fung凰

雞龜骨滾羹

冇份著

傻

回應 #7 雞龜骨滾羹


    下下世，若有鉛相見，我租比你着

wing85

lks19650501

有錢人玩意