想問下大家意見，今次我排家庭白核WM0009X，夫妻二人，計劃未來生小朋友，而家目標係買四百幾呎嘅單位，排頭位心水係綠怡雅苑425呎一房單位，因為自己開公司，擔心過唔到壓力測試，所以只能夠買三百零萬單位，但今日居然見到嘉順苑仲有好多單位無人買，而家煩緊嘉順苑同綠怡雅苑究竟揀邊個…
我計過，嘉順苑大綠怡一房40呎(我當綠怡個20呎露台係廢嘅先，因為露台唔可以間房)，但係嘉順係單幢樓，管理費過千，斜坡又斜又近，建築公司又係最差嘅PaulY，又係清水樓同公屋嘅裝修，又近中學嘈到飛起，最緊要係七千幾蚊呎…但佢又好近沙中線顯徑站，老爺奶奶未來又會搬去顯徑方便照顧，巴士站又近，又唔使過壓力測試，2018就可以上樓…而綠怡雅苑就得一房，唔知點間多一間房俾小朋友，地點比較偏遠，交通配套比較差，亦有斜坡，管理費都係過千，仲要2019先收樓…但房協有五百萬去俾未來維修斜坡費用，管理費同嘉順苑差唔多但有會所設施，送裝修，外觀質素同私樓一樣，景觀可以望山(一房單位只能向北…)，唔知大家可唔可以俾D意見，好煩惱…
