白色一地都係!迎接京官要膠膠地?
2016-05-07 00:24:00 HKT
主理港澳事務的全國人大委員長張德江將於月中訪港,社民連立法會議員梁國雄明言會在張德江訪港期間,以「廢除8.31,實現雙普選」為主題組織示威,今日工黨立法會議員張超雄於其個人facebook表示,發現政總一帶有工人在地磚縫間塗上膠水,仿效2005年世界貿易組織(WTO)香港部長級會議時,預防韓農以地磚作武器將磚頭固定的方法。
工黨立法會議員張超雄今日在立法會受訪時,就指昨晚開完立法會離開時,已「聞到一陣膠水味」,發現立法會門外已被黐膠水,見到工人正在施工,今早則見工人在中信大廈門外進行工程。
張超雄指,覺得黐膠水一事與張德江來港有關,「每逢出現呢啲權貴,我地就發現政府非常緊張,要做好多防護措施,反映現時政權嗰種虛怯,不能在平和、講道理的情況下,與市民溝通,呢個政權好怕人民」。
張超雄又指,事件反映梁振英的管治失敗,認為政府今次是「整色整水」,是想盡量保護權貴,「黐膠水係咪保護到啲權貴呢,定係權貴根本唔需要保護,要多啲同人民直接溝通? 如果政策回應到市民需要,其實根本唔需要用呢啲小動作去防衛」。
問到張德江是否有計劃到訪立法會時,張超雄就指,按他理解,立法會主席曾鈺成有意願邀請張德江到訪立法會,但詳情他不清楚,「當然我唔會贊成市民喺任何情況,用暴力手段、包括掟磚去同權貴溝通,不過呢件事只能反映我地今天靠講道理、擺事實、靠和平理性方式去同權貴溝通,的確出現好多困難,少部分年輕人有不滿會用此方法,我相信張德江來,香港市民亦未必會用到呢啲手法,認為當局是小題大造」。
問到環保地磚原有重用作用,政府現時「黐膠」是否違返原來用意,張超雄就指,有研究人士指出,地磚本應通風,讓水可以滲入,以防止積熱現象,「現時用膠水黐咗,係失去哂呢啲作用」。
張超雄今日在facebook表示,張德江來港在即,政府在立法會外面行人路黐膠水,但認為一個虛怯鬆散的梁振英政權,不能以膠水鞏固起來。2005年世界貿易組織(WTO)香港部長級會議大批韓國農民來港示威,港府為防止示威者將道路上的雜物及渠蓋等挪用為武器,警察將附近道路的渠蓋封妥,並在行人天橋圍上鐵網,同時使用黏合劑將地下的磚頭固定。