|
心情動態：
來自非公營房屋 |
【有片】謝賢爆粗掌摑曾江：一早應該打
【on.cc東網專訊】藝人胡楓、曾江、謝賢和JOE JUNIOR出席《4個小生去旅行》記者會。期間，謝賢因為對曾江有積怨大動肝火，爆粗狂數曾江，講到火上心頭時，謝賢更一邊爆粗：「X你個XX」，一邊衝向曾江出拳，更摑到曾江塊臉。
謝賢扯火過程十分精彩，快啲上《東網電視》睇片啦！即時新聞都掛咗片架。 另外謝賢事後接受《東網》電話訪問時，語調輕鬆，明顯未有受事件影響心情，更與記者有講有笑。被問到心情平伏沒有，他說：「心情好啲啦，你聽日睇報紙就知啦！」記者問心情變好是否因為打完人洩了忿，他說：「我梗係要打佢啦，你哋見過我咁嬲未？我做咗幾廿年戲都未試過咁嬲吖！」記者問何事令他生氣，他即謂身邊有朋友，故待會才再回覆。  本帖最後由 ricky6882005 於 2015-08-12 19:08:47 編輯 |
||
|
|
|||
|
心情動態：
來自非公營房屋 |
【有片‧一刀不剪】謝賢盛怒出掌 打中曾江
http://hk.apple.nextmedia.com/enews/realtime/20150812/54080349 無綫找來曾江，聯同謝賢（四哥）、胡楓（修哥）及Joe Junior拍攝真人騷《四個小生去旅行》，當年被視為曾江頭號死敵嘅四哥，早前在記者會上兩人已火星撞地球，更預告拍攝時大打出手都唔奇，網民紛紛留名話等睇「血戰」，亦有人話曾江係麻煩友，四人於莫斯科及聖彼德堡16日拍攝之旅，定必「出事」，估唔到今日宣傳記招後，四哥按捺不住，爆粗鬧曾江詐病又屢失場，更企起身打曾江，點知坐喺中間嘅胡楓企起身擋，因而中拳，眼鏡飛脫，曾江當場呆若木雞。 事發時，本是大圍記者訪問眾小生行程趣聞，佢哋話拍攝期間好多危險遊戲都係四哥頂晒，當時有記者問四哥拍攝期間是否有很多不滿？四哥即點頭，之後一直冇出聲。 訪問完後，四哥坐埋一邊，另外三個小生就接受TVB訪問。四哥當時同文字記者一齊，但表明要等埋三小生先受訪，又明言要等TVB高層離開咗先。當時四哥黑晒面，生人勿近。 到三小生接受完電子傳媒訪問後，四小生合體，四哥開始講喇:「我哋幾個人今次旅程之中，一個就係跛嘅，廢嘅!」再直插曾江；「一路由頭到尾都坐輪椅，仲要我哋幾個推佢，但佢其實個人好活躍，根本就係扮嘢。 四哥又話曾江流鼻血四個鐘，曾江聞言即反擊話係有四個鐘，四哥即爆粗:「四個鐘你死X咗喇！」曾江堅持真係流咗四個鐘。 四哥又話，佢哋噚日去咗錄音，但曾江行嚟行，好嘈。曾江即反擊:「地氈嚟0架！」四哥劈頭謂:「地氈都好嘈0架！」講講吓四哥突然彈咗起身，一手揈落曾江嗰度，中間隔住嘅胡楓即起身擋一擋，甩咗半邊眼鏡，片中所見，四哥出掌之際，亦有觸及曾江的面。 打曾江變成誤中修哥，四哥難按捺激動，指住曾江鬧，邊行邊鬧走人，上車前再拋下一句：「有冇見過我咁嬲，發脾氣？」       
|
||
|
|
|||
|
心情動態：
來自非公營房屋 |
【謝賢出手打】曾江：佢衝動啫，冇事，老友到冇得老友
http://hk.apple.nextmedia.com/enews/realtime/20150812/54080551  今日出席《4個小生去旅行》記者會時，謝賢(四哥)出手打曾江(Ken)，不過就被胡楓(修哥)擋住，但四哥依然整到修哥眼鏡飛脫，嚇親唔少人。 當事人曾江今日接受電話訪問，講到四哥郁手打佢時，Ken哥話：「(四哥係咪打你呀)老四?佢衝動啫，冇事，冇事。(有冇打到你)冇打到我，佢衝動啫，冇大事。(會唔會告佢打你)告佢?冇咁嘅事，大家朋友，老友到冇得老友，係咁啦。」 問佢係咪同TVB夾宣傳?曾江話:「梗係唔係啦，點會呀。」拍嘢期間拍得唔開心咩?佢就話:「唔係呀，好開心喎，佢份人係咁架啦，我冇怪佢。」以前同四哥拍戲有冇試過嘈交?佢表示:「咁又未試過喎，冇事嘅冇事嘅。」四哥之後有冇打番比你?曾江話:「咁又未喎，佢應該會打嘅，冇事嘅，放心。」  
|
||
|
|
|||
|
心情動態：
來自非公營房屋 |
【殃及池魚】無辜被四哥打甩眼鏡
修哥慘慘豬：搵我嚟搞，唔係呀嘛？ http://hk.apple.nextmedia.com/enews/realtime/20150812/54081015  胡楓真係慘慘豬，眼鏡都飛甩咗﹗ 今日出席《4個小生去旅行》記者會時，謝賢（四哥）出手打曾江（Ken），不過就被夾咗喺中間嘅胡楓（修哥）擋住，搞到修哥副眼鏡飛脫，嚇親唔少人。 一直做和事佬嘅修哥，事後問佢有冇嬲四哥？佢笑笑口話﹕「冇呀，一啲都冇嬲，冇唔開心。」 講到四哥懷疑Ken哥詐病？修哥補口兜話：「講笑就咁講啫，呀....佢唔知係咪詐病0架啫，講笑，當時咁講，我唔知點解.....。」喺俄羅斯拍嘢時有冇跡象？修哥話﹕「冇，絕對冇，幾好傾，仲成日飲紅酒。佢哋好多時傾偈，兩個傾偈多過我同佢哋兩個傾。」 係咪有多年心結？佢話：「呢樣我唔知，你哋（指記者）寫嘢呀，我講嗰樣你哋寫嗰樣呀，唔好寫歪啲呀。」係咪夾埋宣傳？佢就笑晒口話﹕「懷疑呀，haha，搵我嚟搞，唔係呀嘛。」 好彩修哥仲識講笑：「打到我唔緊要，千祈唔好打親我眼鏡啫。」叫四哥賠番副眼鏡畀你？修哥話唔會：「等佢下咗啖氣先。」咁幾十年嚟有冇無試過勸交？修哥話﹕「係喎，有㗎，喺電影裏面有試過勸交。」
|
||
|
|
|||
|
心情動態：
來自非公營房屋 |
【曾江中掌甩助聽器】四哥連爆7次「我X你老母」：歡迎佢追究
http://hk.apple.nextmedia.com/enews/realtime/20150812/54080997  噚日錄音俾曾江窒一窒，加上之前拍攝時的積怨，令四哥謝賢怒火難下，本來錄音時已經想起身打曾江，但礙於那是無綫地方，不想鬧事，「搞到無綫唔好睇」，故忍到今日。最令四哥嬲豬係，走嗰時，曾江仲同佢講：「四哥，車埋我！」氣得四哥怒道:「我車佢老母，我怕佢乜，佢再講一次，我話唔X車，X你老味！」整個電話訪問中，四哥7度爆粗「我X你老母！」 經過噚日俾曾江一氣，四哥自言返到去成晚瞓唔著。四哥接受本報電話訪問時說:「頂住度氣，諗住今日記者會落你面，結果去到嚇死我，原來好多高層喺度，結果我梗係唔會做啲咁戇居嘢，等佢哋走咗，我同記者講，我預備兜心打佢，阿修喺中間攔住我，我打佢一巴就算，我心都唔安落唔願意㗎，跟住走咗。」 事發時電光火石間，大家亦來不及俾反應。被摑後曾江有何反應？四哥表示:「佢猛話唔係唔係囉！吓！我真係頂你唔順，唔係淨係坐輪椅嗰吓呃我哋，好多嘢我唔可以講出嚟，講出嚟好似八卦婆，呢條友我識佢幾十年，喺台灣我哋成班人排擠佢，唔同佢玩，我忍耐力幾好，忍咗佢十幾廿日。（下咗啖氣未）下咗少少（怕唔怕曾江追究？）歡迎佢追究。」睇番片段，四哥摑曾江時，令曾江助聽器飛脫。 四哥離場後，過咗海去四季酒店歎茶。約晚上近七時，四哥走人，見佢已經下咗啲火:「呢個人唔係咁樣對佢唔得，佢以為個個都可以恰，嗰啲工作人員梗係俾你恰到，但係我唔得0架。(你覺得係佢度橋出嚟？)我喺錄音室配音佢窒我，我噚日已經想打佢，不過喺無綫嘅地方我唔打，OK，係咁喇﹗」 本帖最後由 ricky6882005 於 2015-08-12 20:00:26 編輯
|
||
|
|
|||
|
心情動態：
來自非公營房屋 |
無論如何都不該打人！
|
||
|
祝未上樓朋友早日上心水樓；祝已上樓朋友安居樂業！
如果大家有任何疑問或分享, 建議大家在適當分區建立帖子｡
|
|||
