今日第四日揀樓…終於輪到我哋揀喇
雖然都好多人分享過…但都分享下啦
事前準備:
1)揀定12個心水mark定個編號+後備名單
2)信…身份證…筆…租約(無用到…但照拎左去)
流程:
信上提大家記得早30分鐘去到樂富房屋處直入就係…去到等幾分鐘就可以登記入揀房中心。
登記左之後會俾揀樓紙你…入到去坐低聽職員簡介點填張紙…就隨即可以入一間房睇即日更新左既名單…大概有20分鐘左右…可以一邊睇一邊填…我哋一埋去睇心儀屋邨嘅時候得返兩間…已經見到有一個編號前過我哋嘅人寫咗其中一間?
之後填好就再入下一間房坐等叫你個號碼就正式揀喇!
好緊張咁等左一陣叫我哋入一間貼滿晒名單嘅房…個職員就拎住我地填好張揀樓紙…由第一個單位開始對…「唔好意思…呢個單位已經有人揀咗喇。」…跟住再對下一個 「呢個有…請問係唔係確定要呢個xxxxxx單位?」答左係之後佢就會同你對呢個單位嘅編號屋邨 樓層 尺寸 租金等…再問你係咪決定要?佢就會給已揀選嘅印仔落去留畀你。
之後再出去一個位置等叫名…講解返揀完要點做…畀你簽啲確認信…就走得…由去到直到走大概一個鐘左右。
最後成功揀房人士就要返去自己屋邨話畀主任聽…佢就會幫你處理後續嘅事。