TVB男藝人鄭雋熹因涉及JPEX案被捕…令佢同林穎彤(Bella)嘅戀情忽然曝光…更爆出二人捲入一宗涉嫌在公眾地方行為不檢嘅案件。有傳鄭雋熹同Bella秘戀兩年…而鄭本身家底唔錯…符合向來鍾情「財俊」嘅Bella口味。之前Bella同過家境良好嘅伍富僑及星級設計師何偉立一齊…但都分手收場。而Bella嘅IG近來就有唔少靚手袋post出嚟…佢就回應話「我都做咗好多年嘢」。
終於捱出頭嘅Bella…查實細個家境清貧。早年有報導話…喺葵涌長大嘅林穎彤…出世冇耐佢爸爸就拋妻棄女…Bella媽媽要獨力湊大個女。試過無計可施之下要抱住Bella行乞同執紙皮…後來申請到綜援先至改善到生活。生性嘅Bella童年時因為想要嘅禮物而參加電視台節目…因此被發掘做童星…十歲時同馮寶寶拍過亞視劇集《萬家燈火》…之後又接show唱歌表演。到16歲Bella參加選秀節目《十人巷》勝出而加入TVB…由於做藝人收入唔穩定…佢試過去眼鏡鋪打工幫補…直至主持《安樂蝸》後漸為人認識…收入先開始穩定。Bella唔止做主持…參演劇集《城寨英雄》孖辮妹「鑫鑫」一角…觸動無數觀眾。近年Bella簽約星夢做埋歌手…再撈多瓣。