幾乎畀網球小將打盲 球證︰我好似Rocky!
2017-02-07 10:27:00 HKT
主裁判加巴斯喺台盃比賽畀加拿大球手沙保華洛夫意外打擊左眼,小圖為電影《洛奇》主角、史泰龍飾演的Rocky Balboa。
星期日喺台維盃比賽畀發脾氣嘅17歲加拿大小將沙保華洛夫擊球意外打中左眼嘅主裁判加巴斯透露,佢喺意外之後去咗醫院仲過咗兩個鐘頭,佢承認自己冇受到更嚴重嘅傷係好好彩,仲話︰「我離開球場嗰陣睇落成個Rocky Balboa咁!」
Rocky Balboa即係電影《洛奇》由影星史泰龍飾演嘅主角,佢喺電影入面經常畀人打到口腫面腫,睇嚟加巴斯受咗傷都不失幽默噃。
沙保華洛夫當時落後英國嘅艾蒙特盤數0:2,第三盤一次發脾氣時候喺褲袋拎個網球出嚟打,點知意中擊中坐喺高椅上面嘅主裁判加巴斯左眼。加巴斯話佢當時都見到沙保華洛夫好嬲,但冇諗過對方會打到佢,加巴斯話︰「情況唔係更差,我覺得好好彩,今時今日啲球員可以好癲㗎!宜家我係ok嘅,我要用止痛藥,但我都預約咗返屋企之後會再睇專科醫生。」