農曆七月俗稱鬼月,各區公園、廣場或球場都會舉辦盂蘭勝會。
屋企人有冇提醒你,聽日開始盡量少出夜街呀?費清阿媽就有喇,因為聽日就踏入農曆七月,即係俗稱鬼月,傳說呢個月鬼門關大開,鬼魂可以嚟到人間,而盂蘭節就係七月十四。(有啲地方係七月十五)
香港係華洋共處,10月慶祝西方鬼節萬聖節,農曆七月又會拜祭吓,街角都會見到有人喺路邊燒香燭超渡遊魂。其實,好多人同費清一樣,因為工作都經常要出夜街,咁有乜要避忌?
玄學家麥玲玲話,農曆七月晚上盡量避免游水,或者去特別陰暗嘅地方例如酒巴、卡啦ok(吓?),至於山墳、偏僻廟宇更加唔使講啦。佢又話,可以多着黃色衫,符咒都係黃色,有辟邪效果。七月十五前後五日都唔適宜搬屋,買或者丟棄大型家俬(咁買咗DSC家俬但攞唔到貨嘅,咪當安慰吓自己囉),亦都唔應該開始裝修。
不過,盂蘭節,無論係佛教所講因目連救母而起,或者道教所講上天趁七月十五日「中元日」赦免亡魂嘅罪,其實都係趁節日燒祭品畀亡魂,尤其係一啲無親無故嘅遊魂,畀佢哋一啲溫暖。所以係大慈悲,一個咁有愛嘅節目,又駛乜咁驚呀。況且,有啲嘢有時比鬼魂更可怕,例如人。
費清