考慮咗好耐出唔出畢業文, 見成日有人問我做乜唔要新樓...咁不如講吓我輪候公屋嘅旅程
2015年9月申請擴市3人, 因為自己唔記得響父母居屋除名,
攪到要2015年11月尾至成功登記
2020年5月申請人等唔切, 去咗移民,
我就順理成章, 成為申請人, 兼減至2人
2022年9月中審查,10月尾轉S2!
一直都以為會有排等...
點知2023年8月1日,
有位麗瑤邨屋邨辦主任打畀我, 問我做咩唔嚟辦手續?
吓?我無留意開信箱, 更加唔知自己轉咗S4!
佢叫我嗱嗱聲第二日過去辦手續
返到屋企至見到封配房信...原來係喜瑤1樓
2/8上去預配辦事處, 見到職員多過訪客,
當時我十五十六, 其中一位職員就說(服)我:
"簽咗同意書先, 收樓時再拒絕都得, 唔駛任何理由"
我見佢好似趕收檔咁, 咪簽咗同意囉!
之後返嚟呢度爬文, 至知道咁多人想要喜瑤
又見到有人出帖, 話可以轉市區,
咁我當然唔駛諗, 一條直路, 立即轉啦(一直都係港島人)
3/8早上, 已經有樂富主任打畀我:乜你唔係已經同意預配喜瑤咩?做咩轉區?新樓喎
我唯有答佢:
我一直都係想要特快港島!我唔要喜瑤啦!
7/8再去多次麗瑤簽拒絕, 主任話呢種情況唔止我一個!
以我所知, 其實係有人簽咗同意書又去揀特快嘅,
不過我真係唔啱區, 何必要阻人上樓呢?
上天見憐, 今年我特快P0078x, 第一組第四日揀,
終於畀我揀到我屋企附近嘅公屋王,
經過一番等待、手續之後, 聽日我單位就正式開工裝修啦!
2013年註冊會員, 係今年我至認真爬文,咁就十年啦~
多謝咁多位師兄師姐們嘅詳盡資料, 特別鳴謝楊管及Tommy師兄!!!
預祝各位兄弟姊妹們, 早日遇到心水單位, 安居樂業!
(新屋裝修好, 我會再po相嘅)