運輸署同巴士公司建議喺 2023 年第四季，將隧巴 907C 同 307A 合併。現時朝早由大埔頭 / 富亨經東隧去上環嘅 307A 打算取消，換來行西隧嘅907C 延長至富蝶邨（經富亨）。
新嘅 907C 朝早由富蝶開出，會經頌雅路同汀角路（大元、沐恩中學），然後由海寶花園跟返原有路線去港島；而黃昏返大埔方向，就會喺安慈路之後改行太和邨亨和樓、大埔泳池、太平工業同富亨（橋底同頌雅路）去富蝶，而唔再入寶雅路（太和站）同大埔頭總站。
分析：
方案會令富亨居民喺放工時間可以由中上環搭車直抵家門，但朝早就唔再好似今日咁可以喺新興直上公路，而要兜埋大中同廣福，雖然行青沙、西隧代替大老山、東隧可以抵銷部份時間增長，但有 988 前車之鑑，情況未必咁樂觀。另外，冇 307A 同 907C，大埔頭、太湖一帶將會失去一切去中上環嘅巴士，最近都要行到太和站或者海寶先有車搭。另外，307A 而家喺星期六朝早有兩班車，但日後取消呢兩班車之後並無任何補償。
