長期受鄰居嘈音滋擾

楊管

長期受鄰居嘈音滋擾

我住緊長者住屋，共用廚廁那種。
鄰居係白咭人士，每日任何時間都可能會自己傾偈鬧交同出入勁大力閂門扭鎖...唔知叫經驗分享抑或叫訴苦 ?
初搬來時，搵過議員幫手，但議員唔理。
最近聯絡了生果報及同慌張西望，未有回音。
我兩年前搬入嚟幾日就發現白咭人士，任何時間，當然包括半夜，佢都會自己傾偈鬧交。初初搬嚟就梗係唔知佢係白咭人士啦~ 同佢打招呼，傾幾句都唔覺有問題，我開頭以為咁啱佢嗰幾日心情唔好先係咁。住咗大約2星期，聽佢自己鬧交嘅情況更多，佢自己傾偈鬧交嘅內容勁恐怖。
佢有時小家電壞、小傢俬爛，拎住件野走嚟問我點算。我就本住助人為快樂之本，同埋希望有人陪下佢、幫助下佢，等佢大叫少D，對我對佢都有好處，所以我都會搵人幫佢維修或陪佢落街買。認真、坦白咁講，一直以來我都無鬧過佢一句，佢每次搵我幫手，我都盡力幫，我有時買零食都會買多少少送畀佢。有時同佢傾幾句閒偈，例如"唉~ 我D 窗貼晒防蚊網，但係出嚟煲水嗰幾分鐘都畀蚊咬，真係好無奈"，而佢係會過幾日趁我起身返工時大叫返傾偈嘅說話出嚟，我真係被佢咁樣嚇過好多次。
我忍咗佢年半嘅時候，有日，我好聲好氣（認真！真係好聲好氣，絕對無鬧佢或串佢）叫佢練下夜晚講嘢細聲D 細力D 閂門扭鎖，佢即時奸笑。後尾，我喺WhatsApp group（我哋有個5人group）先後講過，唔明點解D人總係要拆樓咁嘈先閂到門扭到鎖，同埋話屋企太嘈 所以搵咗份兼職返星期六日；而佢都係過幾日趁平日我朝早起身返工就瘋狂大叫返我喺WhatsApp gp入面所講嘅內容。
我見我直接同兜圈講都無用，所以我先後搵咗4個保安撞見佢時提佢細聲細力，佢就每次都更嘈。我搵管理公司講，副經理去勸喻完，佢又係更嘈。我就搵房署主任，主任勸喻完佢，佢都係更嘈。所以我就強烈要求嚴厲執行扣分制。主任就話，要搵保安上嚟聽到佢大叫、大力扭鎖閂門，開頭話要11次記錄，後尾改口話要13次記錄，我都照做，同保安一齊聽到起碼有17次，已經比主任要求嘅多。而我得返嚟結果係，保安聽到佢嘈，保安作出勸喻，而佢即時細聲咗的話，保安照咁樣寫紀錄就會唔計。要計的話，就係要保安勸喻後，佢唔理，仍然持續咁嘈。
結論就係：不論佢點樣大叫都好，只要佢喺保安面前靜咗少少，保安行開後，佢點樣更嘈都好都唔會有人理你。你點樣按房署要求去做都唔會做到扣佢分。你只有繼續每日每夜無得瞓，不停咁因為有人大吵大鬧、閂門嘭嘭聲、扭鎖啪啪聲而嚇親，沒有停止的一日，除非是但一個死咗。
我現時做法：平日，佢一開始自己傾偈大聲到我聽晒所有內容，我就不斷咁播歌，播到夜晚10：58先熄機； 紅日就唯有出街。佢大力閂門扭鎖，我就仲未諗到對策。

5/5/2021 update
上星期打咗封投訴信交去房署總部投訴呢度屋邨辦職員。 今日收到回覆信，封信係由呢度屋邨辦發出，話已將我的投訴轉介畀管理公司，叫我以後有乜事就係搵管理公司！
即係交信去房署總部都係無用 ！ 投訴無門！
（代發帖）

Ggk

吓,真係唔好彩,請問邊條邨幾樓

rickyloh

問吓邨辨，有冇得調遷⋯⋯

lamchauho

報警，要佢強制入院治瘵

CardyLam

揾區議員幫幫手

ray12381222

helloeverybody

藥房買3M耳塞頂住當先，幫下先，咁落去自己都陪佢din埋，慘

524545309

我媽隔離屋果個都系，夜晚11點幾系度敲，早上7點又敲，而且越來越大聲，打去樓下保安室，有人上來問佢敲咩野，佢話地板唔平要敲平，樓上果個晚晚11點幾剁肉餅，記住系晚晚，投訴無數次，無用

imhannah

深表同情，見到文字都覺得辛苦
你條邨仲有冇其他議員/社工？逐個搵吓，聽吓意見都好。
問吓有冇得調遷？
研究吓抽綠置居/居屋?

YY1332

回應 #8 524545309

天呐。。。