2021見主任「政府暫停WFH後 終於到我去審查」

lhy2020

2021見主任「政府暫停WFH後 終於到我去審查」

前幾星期有啲時間上網望吓而家公屋排到幾多號幾時到自己，結果一睇原來已經即將要審查。  
*以我所知係每月15號就會係房署嘅公屋申請電子服務入面更新一次，我咁啱15號登入見到我要2月22日去審查，當時我係未收信嘅。
之後入呢個論壇 睇定師兄師姐分享，感覺我審查過程同其他人差唔多。

我天倫樂3人 14年5月申請，7月藍卡，16年5月家人離世，房署16年7月出信通知即時改為2人，家庭收入及資產即時跟2人申請限額。
G1354XXX (天倫樂早半年= G13425-13447)
*信中提及會會隨時覆核我是否仍合資格申請公屋亦有權取消。 等候多年都冇收到任何覆核通知，期間收入同資產亦冇超額。

由14年5月到21年2月，等候咗6年10個月先到我去見主任詳細審查。
信中提到要早25分鐘到樂富，老人家行得慢啲所以我地大概早15分鐘左右到達，入到去上一層就係等候大堂，右邊中間位就係邀請信中提到嘅1號櫃位，去嗰度交返邀請信先（係右上角寫返自己嘅電話號碼）。之後佢會俾個號碼紙你 留意在場螢光幕等叫號碼入會面室，會面室係1號櫃位隔離入去，建議大家可以坐喺附近等唔洗行太遠。
當日上午都幾多人係大堂等候查詢/見主任的，到我號碼見嘅時候係比原定時間遲咗10分鐘左右，入到房，主任會叫你拎預備咗嘅文件出嚟，逐一俾佢。

lhy2020

當時次序如下：
-第一 申請人及家庭成員的身分證正副本,之後主任問我們居住的地址有否改變以及現時居住的地方租金多少、是否合租；
-第二 自己填嘅申請者聲明（記住唔識填或唔肯定嘅可以留空主任會幫你嘅，同埋唔好自己簽定名）；
-第三 所有人嘅投資聲明書（申報返你目前所有有現金價值嘅保險，由於我有兩份保險，我就事先印咗退保價值同投保資料有自己名同投保日期嘅版面連同兩份保單正本拎去，由於有一份買咗唔夠一年所以就冇年結通書，最後主任只係收咗我嘅年結通知書影印本及退保價值同投保資料影印本。*過程中完全冇叫我拎正本出嚟。）主任會按你退保價值計一次，對完之後叫你簽名。
-第四 所有人嘅投資現金總值（定期、基金、債券、股票、存款證）由於我只係有股票所以我係將股票戶口嘅資金淨值連同股息紀錄報表按見主任前一日截圖列印出嚟，咁我過去6個月內冇股息收入所以主任只係計我資金淨值。主任今次係會俾另一張表格你申報返你嘅投資金額以及有冇股息，然後簽名）
-第五僱員薪金證明書（因為我地申請表中得我有工作收入，我就交返預先俾公司填好嘅證明書，證明我有固定月薪以及審查前一日所有銀行存款結餘證明（早一日係ATM印定紀錄連提款咭一齊印一個副本，因為ATM紙冇戶口名同完整號碼的）而我嘅家庭成員係用薄仔戶口（同樣審查前一日去打薄之後印定副本，由於主任有機會要睇返所有申請者審查前六個月的銀行月結單紀錄，所以我連舊簿仔都印定過去6個月先，記得要有埋戶口名同號碼頁面）最後主任只係查看審查前一日的ATM及簿仔紀錄影印，亦冇要求查看及交出我們過去六個月的正本或副本）
-第六 家人資助生活費/ 老人家生果金申報 ；有生果金的人士主任會俾另一張表格你，申報每月收取的生果金額（不計入息只作紀錄）及申請人及所有家庭成員有否收取任何人或親人的生活資助金額。 由於早年申請時我們有提及過每月收取家人的生活費，現在已經沒有因此要另填表格申報沒有再接受任何生活費。
-第七主任會問一次有冇其他資產未申報（土房地產、車、牌照、業務、手頭現金有否多於$5000）
-第八 已故家庭成員的死亡證副本
呢點係我地需要補交資料嘅地方，原來當年房署寄來的申請人及家庭成員更改信中雖然已經更新最新的申請人及家庭成員數目，但到審查的程序仍是要交出死亡證副本。我亦有問主任若果死亡證已經遺失亦需要重新辦理的。介時亦要填多份表格申報已故家庭成員已在申請表內剔除。
-第九 主任會同你核對一次申請者聲明內所填寫的資料，呢個部份基本上同我地預先填左嘅數字係冇任何出入嘅，只係需要特別留意以下較為易填漏及出錯的地方（表內第一部分1.利息、紅利及股息 ；2.投資；3.手頭現金；第四部份主任會話你知當年申請日期；第五部份選擇居住單位地區 呢個部份主任會提醒你只可以選擇一個地區，我亦有即時查詢主任我們的號碼排邊條隊會較近，佢都表示市區及擴市也差不多加上我哋天倫樂可以早半年派房，但實際距離及時間都要等配房小組通知，最後我哋仍然繼續選擇市區）
-第十 更新簽名 （交齊所有資料核對無漏填後，主任見因為距離申請多年認為我們的簽名與當初有點出入，加上老人家年紀大已經不方便再簽全名，因此給我們2人更新簽名，呢個部份幾方便長者的，佢會建議長者只簽名中的其中一個字以簡化程序。我亦有提出問可否用圖章代替，主任表示有需要也可以，我認為大家日後有需要也可以替家中長者預備一下啊！

審查部份到此完結，整個會面過程大約25分鐘,離開前主任亦有提及兩個月內會出返審查結果，以郵寄形式作準，我亦係審查後第二日立即寄出補交死亡證資料。

lhy2020

補充：審查的準備文件當中，租金收據（我係合租的），銀行過去六個月的月結單、舊簿仔、糧單、所有保險正本、出世紙都無要求拎出嚟，主任亦冇提出要查閱，只按上文提及次序完成審查

大概係2017年起每年我都有申請房署嘅特快公屋編配計劃邀請，係19及20均有被邀請參加揀樓，兩次揀樓計劃中也沒有合適我們的單位。

希望以上資料幫到大家，如果我有資料亦會再同各位更新?截至呢篇分享心得，我仍未收到審查結果。祝大家早日安居樂業

San9

LuckyTan

好詳盡. 謝謝分享

babyjoyce620

多謝分享

karentan00

yls102

Jody1017

謝謝分享

蘭Lan009

謝謝分享