首先能夠喺超額咁多倍嘅情況下抽到,而又喺咁嘅市況下買到,可以上車已經覺得非常非常幸運。以下如實報告唔算投訢:搞好律師樓文件,心情興奮地去收樓,職員有禮貌講解詳細(8/10分),帶我3/F行個圈就上單位。一開大門感覺比想像中細DD(我2房單位)用尺量一量…頂呀~都有幾多位呃咗秤,同售樓書標示有出入,間大房短咗33CM,其他位5-8CM不等,加埋加埋唔知少幾多呢~有時間再睇吓資料接受幾多誤差先。繼而發現橫樑位無處不在…之前諗嘅擺位要重新規劃(走廊位最無厘頭,我會整假天花收納位)。驗樓師傅喺我頭痕緊嘅時候出現,幫我驗咗2hr左右,令我更頭痕…主要問題:油漆+地板非常麻麻,崩/花/痕/色差都不缺,廳牆身2處空鼓,五金件啲過緊有啲過鬆,玻璃門窗3分1有花或氣泡,露台門有漏水+露台去水倒斜排唔到水,電制壞燈同開關離隙等等……一屋memo紙為我灰白嘅心情帶來一點點色彩~ 8頁執修報告都懶得打入APP,直接連鎖匙交落大堂,整體手工(5.5/10分)唔知係咪真得執得哂同要用幾耐時間~最後講講屋苑景觀位置(9/10分)景觀幾開陽,位置學校區,密度無海邊一排新樓咁高,靜靜哋幾舒服,行去地鐵5分鐘內,食嘢買嘢應該都好方便。 希望鄰居們順利收樓+盡快執修好+盡快搬入。