早兩日完成埋上律師樓既環節…今日已經正式成為業主…以下係我小小既分享…希望幫到大家預算成個過程既時間
入紙申請到房署至房署確認 - 大約2個月
批左至到律師樓辦手續 - 2x日內 (下面再講)
銀行申請按揭批刻 - 2-3星期
批刻後準備文件 - 1-2日
上律師樓簽文件再等銀行出票畀律師樓 - 2日
過程需要3~4個月
Step 1 - 去屋苑辦申請樓價表…然後你就會簽幾份文件…之後就等房署出畀你(大約等一星期)
Step 2 - 當樓價表出左…邨辦會打電話畀你叫你來取 …如果你想節省時間…又可以即場決定到要唔要…你同職員講要呢個單位…佢就會比一疊應購文件你簽…我唔建議你即場簽…因為當中有啲要畀家人簽…有啲細節又真係要睇… 同最重要有一張係買前確定屋企有無問題要房屋署跟進 (例如水管漏水/天花滲水等等)…有就要填畀佢跟…無就之後有咩野唔關佢地事佢地唔會負責（呢到需時因人而定…齊人簽名/驗樓/了解細節呢幾點好重要）
Step 3 - 當你決定左買…你要去銀行買一張$2500既本票畀房署 (其實即係一張你去銀行畀現金$2500叫佢開張枱頭係房署既支票你…任何銀行都可以…一定要銀行開…你有個人支票都唔得)…連埋租約…填好既文件一齊拎落屋苑辦…佢地check完無錯漏就會同你send去房署做審批畀唔畀你買…基本上你唔係成日拖卡數 / 借貸唔還 / 出面欠人幾十萬呢啲都會批…總之唔離譜都批（呢到大約要等一個月）
Step 4 - 批左之後…屋苑辦會打電話畀你叫你來取文件（當中包括房署既批准信…律師樓既list…銀行申請morage等等既資料）記得問佢取回意向金既收據…好多銀行都要做reference
Step 5 - 收左呢份文件隔2~3日你應該就會收到律師樓打電話畀你…每個屋苑都有一間房署提供既律師樓畀你參考…如果你無用開既律師樓…你就可以用佢畀你果間…因為佢地做開…而佢打電話畀你…就會問你用唔用佢地…如果你用…就會提你幾多號前要去銀行簽好晒D文件上佢到…唔好以為個時間係根據你住夠一年果個日子為準…佢一定要你提前…簡單講…我個單位11月25前要購買…我11月4日就係deadline上律師樓…同步地…佢地都會再寄信通知你幾時上去…如果你要遲過佢既要求…要罰息 (點計要問律師…我當時聽極都唔明白)
之後你就可以跟住個list去問銀行申請morage啦…間間都大約2-3星期批刻…你地要預時間…一般批左佢地都會打電話畀你講你知批唔批 / 批幾多/ 息口 / 還幾多呢d基本資料…建議你啱唔啱都叫佢出左文件畀你先…因為有d銀行要你口頭同意左先準備文件你簽…有d又會同步出埋…間間做法唔同…而準備文件有時都要2~4日不等…咁等文件呢段期間你就可以睇埋其他你申請左既銀行有結果未再比較再決定
當銀行出左文件…你就可以上去簽…去到呢步其實你帶id上去就得…因為佢要既野…你申請時佢會叫你畀晒…呢次都係詳盡講反合約內容畀你知…當你簽完…銀行係需要1~2日將呢個文件送去律師樓…送到上去律師樓先會正式開始做野
另外 - 如果你唔想搵個list果啲銀行借…要再向房署申請…同埋果啲無房署做擔保…除左息會高仲可能批刻上比較嚴格…真係唔建議
到上律師樓果日…無咩野需要帶…帶ID同錢 (千奇唔好見律師信話比千幾蚊就真係帶千幾元…當中仲有好多雜費要畀…例如印花稅/ 做契等等) 所以你一定要親自問律師…正常係幾千蚊…上到去又簽一堆文件…當中你係銀行簽既果份文件…佢會有一份COPY要你係律師面前簽多次…去到呢步唔洗擔心…照佢地指示簽就OK
當你簽完…律師樓就會正式向銀行借錢…需要2日等銀行出票畀律師…咁果日之後…你就會正式成為業主架啦~~~到時你都仲有一日要上去律師樓…佢會畀反張證明你已經買左單位既信你同埋要做一個宣誓 (好似係為左第日唔需要畀高稅既宣誓...我仲未去所以未知)
之後係就可以去返邨辦退租 / 退租按 / 交管理費等等程序就完成架啦
大致上就係咁…時間都係依我個case為例…其他人可能有快有慢…不過預鬆好過預緊…希望幫到大家行快一兩步早日完成…做業主！
祝大家順利完成！
