一日無食嘢的板間房婆婆

無飯煮婦

一日無食嘢的板間房婆婆

2016/02/16 星期二 10:11
一日無食嘢的板間房婆婆

撰文

:

Ike Cheung

「碰到住在板間房，已經一日無食嘢既婆婆。」尋日係某區見到一個婆婆揸住d紙皮箱坐係樓梯底，即時攞d「火柴」(編按：物資)出黎同佢傾兩句分享下，問佢食咗飯未，佢話：「未食呀邊有咁好彩丫」，當時五點幾，我仲以為只係未食晚飯，無為意，再繼續傾，佢話以前係轉角的麥當奴做過清潔，四千蚊個月，但係搬咗就冇得做lu。
婆婆住係附近的板間房，每日好多時候都坐係呢個樓梯底，等旁邊一個零食店攞紙皮箱出黎，因為腳唔好，唔行得遠。

我同婆婆傾計時，女朋友火速入零食店買咗罐最大的餅乾，加上一些「火柴」，諗住分享晒比婆婆就走。點知婆婆叫住我哋，話可唔可以幫佢打電話，雖然我哋有啲趕但係都要幫一幫婆婆。
問佢打比邊個呀，佢摷紙皮箱底的一個膠袋，裡面有張霉爛卡紙，上面寫住兩個唔太清楚的電話號碼，但無任何名字。我問佢係邊個黎嫁，佢話係堂妹。

接通後，我由得佢自己傾，佢叫堂妹黎呢個乜乜麻將館對面揾佢，對方又好似話唔黎，好似講得唔清唔楚， 雞同鴨講，越講越激動，我都係幫婆婆同堂妹傾下。

我話我只係路過幫婆婆打電話，堂妹話幾個月無婆婆嘅消息，仲以為佢走咗返鄉下，其實婆婆根本都無電話打比人 。最後我講清楚正確位置比堂妹知，堂妹話星期日下午兩三點過來看看婆婆。
之後婆婆再問我可唔可以幫佢打埋另外一個電話俾一個舊「工友」。婆婆好有禮貌，不停話：「唔好意思，阻住你」。我同佢接通之後，婆婆又再雞同鴨講咗一陣，我都係幫佢同對方傾。

其實電話裡的，並唔係「工友」，而係附近住的一位好心姨姨，之前呢位姨姨係呢頭見過婆婆，亦上過婆婆床位探過佢，但已經兩個月無見過婆婆了。好心姨姨話佢轉頭落黎看看，叫婆婆唔好走住。
我哋繼續同婆婆傾詳細啲，先發現原來佢已經一日無食嘢了，個心即刻沉一沉，好心闟。
即刻話要買盒飯，問婆婆鍾意食乜。佢當然話唔要，我哋再三迫佢佢先講話鍾意食午餐肉，心諗「午餐肉」無益噃，我問佢豬扒飯好嗎？粉面好嗎？佢係都話午餐肉，咁女朋友再走去買飯。
婆婆再話：

平日最鍾意食午餐肉同埋腐乳送飯。

其實好明顯跟本就唔係「鍾意食」，而係呢啲就係婆婆平時食既野。
女朋友帶左盒飯返嚟，婆婆都話唔要，當時婆婆雙眼通紅，真係心噏到爆。我拍拍婆婆背脊叫佢轉頭快啲食飯呀，我再唔走阿媽等我啦 (其實都唔係約咗阿媽) 同婆婆講拜拜後，我哋從遠處望望，見佢開始飲湯，心都舒服啲。

我得閒會再去撞下婆婆，下次會係附近小店買啲食品分享比佢。

Ps: 午餐肉飯加例湯 旺角賣 $47

Ps2: 紙皮一斤賣到 $0.6 (高價過深水涉一毫)

Ps3: 47蚊 要執940個汽水罐 或 79斤紙皮

沒有好人好事，只做該做的事。

講咁多都係想感染多一個「傻」人去留意自己社區的基層街坊。

No matter what, 我會繼續帶「火柴」一見到有需要就「放火」(編按: 分享物資行動)。

另外，一般係唔會公開街坊的位置，以免做成不便滋擾。大家如果留意不同的社區，其實肯肯定有好多街坊都有相似需要，大家分散分享，遍佈港九，意義更大！合十感恩。

全文刊於Ike Cheung facebook，獲授權轉載。

JoelLai

回應 #1 無飯煮婦

唉!

無飯煮婦

每區都有呢D老人家, 只係大家選擇"睇到"定"睇唔到"

jp_dannywong

chan328

MaggieWong

窮老的悲哀

wcmcw

Benwilson