首先最近有好多街坊開始入伙，真係恭喜曬。不過近來係討論區之中，亦開始出現唔小對屋苑或鄰舍之間既批評，例如走廊擺野吖、對管理人員既不滿甚至對街坊既批評，而我對此亦有小小感想：
其實老實講，有好多野其實係互相尊重，近十幾年香港既投訴文化盛行，以前鄰舍之間會互相幫助同忍讓，有好多野咬文嚼字指人地唔岩，但係某個範圍內都可以忍到，但今時今日好多人已經變到由捉人錯處為樂咁既心態，當然如果走廊位置擺得太阻人當然有問題，不過係自置物業中，好多時唔多唔小門口有小量物品擺放其實都係合理範圍。
至於寵物（主要係狗啦），好似小弟舊居附近既麗晶花園，係一個居屋屋苑黎，地契都寫到明係唔可以養狗，但基本上唔影響到人其實無乜人會理，呢d可能有人覺得係叫做唔守規距，但係我看來其實呢d都係一種包容黎，當然大前題係狗主要有公德心，你養既狗唔好大到嚇親人，同埋聲量仲有狗隻既生理需要都唔應該會影響到人為首要。如果到做咁既話其實佢養寵物與否真係影響唔大。
同埋我見好多post，大家都有一個共識就係既然買得樓就係係社會上向上流動，小弟所見越高級既住所，呢d養寵物情況好普遍，反之只會係公屋先咁避忌，既然而家大家都做得業主，係咪應該將公屋既規定放返入自置物業度呢？當然唔係話要唔守法，只係大家有一個共識，將來成立法團，養唔養寵物呢個規定係可以改既。
而最後一點，我見到大家係唔同既po度都表達對管理人員既不滿，但其實相處之道在乎尊重，你俾幾多人地，人地俾幾多你（我指俾既唔係金錢上，而係對人既態度），無錯我地係有俾管理費，但何謂管理費？大樓公用部份既日常消耗、水電、公園設施，仲有管理人員及保安人員等，但以上種種都不包括別人既尊嚴，你係買左以上既野但唔係買人地既尊嚴，有時真係無必要惡言相向，我唔知大家做咩行業，但都應該有對上司或者客人既機會，如果對方係惡言相向，你做得唔開心，咁點會俾到好服務，就正如一個保安、一個管理公司既人員如果做既屋苑居屋質素高，有禮既話，佢都會做得開心，做得用心，反之如果佢做得唔開心，作為居民既又有咩益處呢？將心比心，仇恨唔會為大家帶黎咩好處。
另外由於小弟係自己裝修，有次倒泥頭順便等搬沙時，我同保安姐姐傾左幾句，佢講起5座同6座既居民好多都好開心，一黎到傾計就好開心話自己住邊座邊層，反而住1-4座既業主好多時都好似唔係太滿意咁，其實呢度都幾好吖，又方便環境又唔錯。以上係保安姐姐大概講既內容，正如我所講，知足者常樂也，祝大家搬入麗翠苑後，可以安居樂業，平安順利。
註：小弟幸運生於8,90年代，童年時住過臨屋區，雖然當時窮但好開心，因為果個正正係香港仲有互相包容既時代
，
