政府龕位政策欠長遠目光
「點解會搞到咁嘅地步呢……以前人哋東華三院都有義莊,畀人賣豬仔嘅人都有位下葬。即使十幾年前,都冇咁多人買私營龕位,政府仲有大把位,加埋華人永遠墳場、天主教基督墳場……但忽然間就失衡,唔夠位。」棠哥說。審計署報告顯示,2006年開始,香港骨灰龕位出現求過於供的情況。吳耀棠認為,政府應成立殯葬事務委員會,估算人口增長及長遠殯葬設施需求,不應只見招拆招,見龕位不夠才再覓地建骨灰安置所。
「起到邊區嗰區就反對!民選議員為咗選票,當然帶頭反對啦。但與其咁樣篤一個地方,點解唔畀區議會主席同居民自己選一個地方,傾邊度起?」棠哥又計數,若每區提供5萬個位,18區便能提供90多萬龕位,一共為超過一百萬人提供生命最後的安身之所。而且,「區區有龕位」也能夠大大減輕掃墓時節對地區造成的交通壓力。羅偉立則認為推廣綠色殯葬是唯一可行的解決方案。「土地得咁多,骨灰一年年的增加,倒不如及早教育小朋友,改變殯葬觀念。」食衞局發言人指,政府一直致力增加公營龕位的供應,地區為本的骨灰安置所發展計劃所覓得的24幅用地,至今已有14個項目獲得相關區議會的支持,合共可提供約59萬個新龕位,約為規劃的新龕位總數的三分之二。
雖然在這行從事40多年,早已看透生生死死,但棠哥想起骨灰龕位的問題時,還會慍怒:「一個人嘅生命,點都叫做對社會有過貢獻呀,點解會死後仲要同政府畀錢買位,仲要想有個安息嘅地方都冇?」對着久久未能上位而感徬徨的家屬,棠哥也只能說,這裏除了初一二三之外年中無休,歡迎家屬隨時前來拜祭。「隨時過來,同先人嘅聯絡咁就唔會斷。」他說。