打工仔瞓過龍遲到俾老細鬧係抵死，如果老細自己遲大到又會點呢？
雅虎靚女行政總裁（CEO）邁耶（Marissa Mayer）早前在法國出席康城廣告節活動時，廣告巨頭IPG安排一個私人飯局，邀請邁耶同雅虎嘅幾個主要廣告大客見面，包括卡夫食品重組後嘅Mondelez、啤酒商MillerCoors，同埋希臘乳酪生產商Chobani等。但邁耶竟然遲了兩粒鐘才到，做東嘅IPG CEO Michael Roth及幾個大客當然起身走人。據《華爾街日報》報道，在場知情消息人士爆料，邁耶當晚親口承認因為瞓過龍所以遲大到。
報道還指邁耶堅持要把一般應該7點左右開始的晚宴時間延至8點半來遷就她，老老實實，你是CEO時個個都是，你坐飛機來大家都一樣，要特別遷就她一個，已是有點過份。但結果再遲兩個鐘，即是10點半才到，食消夜就差不多！遭受如此傲慢又不禮貌的對待，既然不重視與他們關係，何須賣賬？不拍枱已是畀足面。廣告是雅虎的收入來源，廣告商是客，做人做事要有分寸識分莊閒，根本不應該要客戶餓着肚來等。換轉是我，即使是朋友飯局，等兩粒鐘？我一早起身走人，以後食飯都唔使預我！
這位雅虎CEO真正目中無人，連講個美麗謊言都懶得，即使真的瞓過龍，點講都不可能直認。在場人士爆開再爆，邁耶還再惹火頭兼爭議，在台上被WPP CEO Sir Martin Sorrell質問她從不回覆他電郵的理由，以及和前董事局成員Dan Loeb的關係，氣氛搞到很僵。
這位出名靚女的雅虎CEO，工作能力我無從評價，但其人品及做事方式，坦白講，不敢恭維！各位年輕人千萬不要有樣學樣，她是奇人我們都是普通人而已，自毀前程不是講玩的！
張慧敏