by Jerry sir
【番工講真話？你癡線架？】
其實番得工，同事就還同事，好多人畢業出嚟都用識朋友嘅心態番工，
其實就好似食放題咁，最後自己食唔落，仲要付出好大代價。
就好似今日咁，成班同事竟然傾咩類型嘅女仔最正，
難得今次男女同事都非常主動參與討論，真係好罕見。
事源一個男教學助理（TA）提起：
「其實前排嚟實習嗰個Peggy真係幾正，又高又索又識打扮！唔怪得班仔咁乖啦！」
之後一位女同事就話啦：「吓，嚟教書著到隻雀咁，佢知唔知咩叫教書？」
數學老師（男）忍唔住插嘴：「唔係喎，人地扣鈕扣到上頸喉鈕喎，
唔好話短裙，佢連裙都無著喎！實習咁耐都著長褲，算係咁啦……」
數學啊Sir都未講完，另一個主任級女同事又話：「吓，你唔好講笑啦！
佢啲衫褲咁緊身，佢行路我見到佢條under邊喎！咁都番得工？
聽講佢攞Distinct，之後請番佢就真係撞鬼。」
聽到呢度，老老實實我都無名火起，但我咁新，都係收皮唔講嘢啦。
不過個教學助理傻傻地，竟然走去駁嘴（佢真係唔駛旨意轉約做教師，唔識做人係大忌）……
教學助理好串咁話：「唔通著太極褲番工咩！你見唔到佢條底褲邊，又會話佢著T-back架啦！」
見到佢咁弱智，我立即插口：「不過教師呢行係敏感嘅，
著衫真係要好小心，我有時著得潮啲都驚啊哈哈！」
誰 不 知，個女主任唔鬼理我，
又講番單嘢：「其實唔止係Miss，啊Sir著衫都要講究囉。之前嗰個著短裙番工嘅Miss，
不知所謂，好彩佢無得續約！（City妹真係正啲架……）
啊Jerry，你著衫都唔該留意吓，你知唔知你會搞到啲學生崇尚名牌、不務正業？」
我 心 諗！屌啊！又關我事！但我都好小心，細細聲咁話：「主任，願聞其詳……願聞其詳……」
本帖最後由 sherrychan 於 2014-05-31 16:06:26 編輯
