賓架L就話佢趁復活節假期讀完本The Intelligence Paradox，內有解釋為何聰明智慧人物會在公開場合失言或在私人場合口出狂言，令到自己陷入困境……等等有趣、夠實用嘅題目，可以借畀左丁山讀一讀，學吓嘢，唔好某日搞到發神經，自毀前程喎！
收完電話冇幾耐，佢嘅信差嗱嗱聲將本書送到左丁山跟前，諗落近日真係不少例子係聰明人講蠢話嘅，最大件事就係NBA呢兩季打起嘅球隊LA Clippers嘅班主Donald Sterling，呢位先生起初係律師，專處理離婚事宜，後來炒樓買賣地產發達，1981年以1,270萬美元買入San Diego Clippers，搬去LA，改為現名。今天NBA主要球員、球星幾乎全部係黑人，好多教練係黑人（如快艇隊嘅Doc Rivers），作為球隊班主，呢位史達寧先生突然對一位墨西哥黑人混血兒女朋友講：「唔好在公開場合與黑人一齊，更唔好同佢地嚟睇打波！」點知私人談話上咗網，咁就大件事，於是NBA罰佢二百五十萬美元，終身不得參與NBA任何活動（包括睇波），強迫佢出售股權。識得在美國買賣地產發達，必然聰明過人，但點解會口出狂言歧視黑人呢？令人百思不得其解。香港蘇錦樑局長係律師，係政客，當然有一定嘅智慧，點解會對內地啲遊客當街便便一事，唔講執法而講包容？林鄭月娥公認叻女，竟會在政改問題講：「請你俾條路我行」，又係精人笨語，依家係市民想請中央俾條路我地行呀！講到政改，校友來短訊通知，新亞文化講座第八講今日下午三點在馬鞍山陳震夏中學（馬鐵恆安站C出口往前行見巴士總站轉左，近頌安邨頌群樓）禮堂舉行，請新亞1987年新聞系校友馬嶽教授講「香港的政治發展與政改前景」，歡迎各界朋友到場聽講。