小弟最近重返保安行業，由於場地同以往不同，所以今次講嘅會係車場為主。

首先，大家見到朗豪坊之類嘅出入口，有人打交通截人截車，你哋唔好以為好簡單。第一，理論上你揸指揮棒，隨手一揮就截到人，但唔好意思，呢個世界好多低頭族，隨時兜口兜臉撞埋黎。佢哋真係為求呃 like ，「置生死於度外」，嗌住「小心車」，都可以充耳不聞，如高僧入定化境。你哋可能話：「佢死佢事，關人鬼事」你亞爺，試吓真係撞死件，睇吓駛唔駛上差館？法官一句：「你點打交通㗎？」真係吟詩都吟唔甩。

講返指揮棒，其實要好有警覺性，要留意附近三秒先好遞出嚟，打到人都事小，最慘而家女尊男卑時代，一個唔小心碰到尊貴女仕胸部，佢講句非禮，你有排唔得閒。

每個場，都有 VIP 存在，起碼有幾廿個車牌要背，車場口除咗打交通，就係留意班大帝出現。如果撞啱佢架車到咗，你 ignore 埋，唔該準備執包袱走人。問題嚟，你要打醒 12 分精神留意出面，但入面又有車出，靠嘅就係隻耳，但有啲車副偈好細聲嘅，真係隨時 miss 咗都唔知。仲有個可行方法就係對車燈敏感啲，但好多車主係未出公家位唔開嘅。

架車係咪兜入黎，正路睇佢有冇打燈就知，但有啲司機好狠懶，去到門口先打，或者直情唔狠打。大佬，隔住道玻璃，我鬼叉知你係咪想入嚟咩？可以預知未來嘅話，我做職業賭徒，何生副身家俾我贏晒啦！係咪都截人？而家人人有躁狂症，阻佢兩秒都好似殺佢全家咁，隨時問候你老母。

禮讓係美德，但有時你截咗人，遞埋手俾個司機入，但佢竟然唔入，你又唔知仲繼唔繼續截落去，放人又唔係，唔放人又唔係，跟手仲要媽叉你點解唔俾人行先。又係果句：「我鬼叉知你想點咩？」

低頭族唔止途人，有時啲司機都望手機，仲要係臨出車場口。大佬我幫你截停晒成村人，就係等你打埋個 status ，等你又唔係，放人又驚你踩油撞到人。

到車場內，唔係吓吓有冷氣更亭咁舒服俾你，夏天真係熱鬼死，秋或冬天你都唔好以為好事，秋涼吹吹下，隨時瞓著。根據法例，保安員瞓覺係刑事罪行，輕則釘牌，重則坐監。

唔係所有時間都忙，理論上冇乜車出入，可以同 partner 吹水都冇人理，但唔好意思，而家部部車都有車 cam ，撞啱講埋啲衰嘢，泊喺附近架車錄低放上網，你真係「多謝高登先」。

講到咁委屈，搵少啲，做工廠大廈咪得囉！錯了，工廠大廈車場口仲煩，因為車分開月租同時租，月租唔駛打飛，而時租就要，一棟大廈起碼幾十架月租，而冇做返一頭半個月，都記唔晒，仲要有時車主換車之類。打錯咗，又係自己哽。

都係果句啦！希望外行人，唔好成日掛喺口邊：「你哋他條舒服工黎架姐」當中嘅痛苦，真係不足為外人道也。