2017-02-05 00:10:00 HKT

好多人去澳洲自駕遊會揸露營車，去到邊就可以瞓到邊。

好多人去澳洲自駕遊會揸露營車，去到邊就可以瞓到邊。

雖然香港近排暖到冬天唔似冬天，但喺地球另一半嘅澳洲，夏季一如既往咁天朗氣清。點解費清會知？鬼咩，成班朋友唔知係唔知夾埋咁一齊飛過去玩，搞到成個Social Media News Feed都係澳洲藍天白雲相，真係恨死隔離。

睇睇吓相就發現，唔少人都選擇喺澳洲自駕遊，仲要唔係一般私家車，而係露營車，貪佢去到邊就可以瞓到邊。不過大部份人香港手上都得個私家車1號牌或輕型貨車2號牌，唔通吓吓都要搵個識揸拖頭嘅Friend一齊去？

不過，原來只要有普通私家車牌，當地都畀揸露營車㗎。費清問過澳洲新南威爾士州旅遊局，原來根據當地規定，只要你揸住嘅唔係P牌或者電單車牌，擁有一般私家車牌兼有超過3年駕駛經驗，就等如持有「Unrestricted driver licence（無限制車牌）」，就可以租架露營車嚟揸。

而當你租車嘅時候，一般租車公司都會要求你出示自己國家嘅車牌，只要上面有寫住英文就得（香港車牌係有嘅），否則先要出示埋國際牌。因為車牌未必有印自己個貓樣，租車時一般都睇埋Passport對樣。部份租車公司更會要求露營車駕駛者要年滿21歲。

但露營車咁大架，平時揸開私家車嘅港人真係揸得掂？費清問過商用車輛駕駛教師協會主席鄭楚光，佢都話揸大車同細車好唔同，雖然外國啲路就闊啲，但大車始終車身高，有唔少盲點，尤其時轉彎同泊車時候，揸開細車嘅容易有意外，唔識揸有一定危險性。佢就呼籲司機揸之前自己衡量吓風險。

Anyway ,喺一個動物多過人嘅國家，兩隻腳可以去到嘅地方有限，露營車自由自在，鍾意就泊喺沙灘旁邊，日頭睇日出日落，夜晚睇星星，都咪話唔歎。當然梗係安全至上啦。

費清