2016-12-26 19:45:00 HKT

兩人於1981年成立Wham!時，佐治的形象是壞男孩，而Andrew的形象是乖仔，現實中卻是相反。

Wham!首支成名作《Wake Me Up Before You Go-Go》的靈感便是來自Andrew寫給父母的字條。

此後能言善辯的Andrew成為組合的發言人、幕後軍師，而佐治就專心創作，可是傳媒對佐治更加有興趣，希望知道他的事。

被飛起的Andew便去了當賽車手，不過未有起色，之後便重回樂壇用不同的筆名寫歌。

近年他不時與友人踩單車，相當健康。

英國男歌手佐治米高（George Michael）於聖誕突然去世，終年53歲。提起佐治於1981年立的二人組合Wham!，大部份人只是對佐治印象深刻，但對另一成員Andrew Ridgeley興趣不大，因為Wham!的歌曲大部份都是由佐治主唱、作曲、填詞，而Andrew只是偶爾彈結他，永遠成為佐治的陪襯。

雖然Andrew對Wham!實際貢獻不大，但他對佐治成長路上是一名重要的人物。Andrew與佐治在Bushey Meads High School讀書時認識，當時Andrew是個很英俊、自信、受歡迎的學生，而佐治是個肥仔、怕羞及臉上生滿暗瘡。由於Andrew的媽媽是該校最惡老師之一，她命令Andrew要照顧佐治。雖然兩人被逼成為朋友，但二人發現對音樂很有熱誠。佐治對音樂很有天份，Andrew已預視都二人合作的話會成為偶像巨星。Andrew親自教授佐治如何成為型男及變得有自信。

兩人於1981年成立Wham!時，佐治的形象是壞男孩，而Andrew的形象是乖仔，現實中卻是相反。不過因此設定令二人漸漸成名。當時推出的《Wham! Rap》及《Young Guns (Go For It)》控訴社會，未能夠取得商業成功。

Andrew明白到當時社會不需要另一隊憤世嫉俗的樂隊，因此提出Wham!轉形象，變得較為開朗及創作可以跳舞的快歌。當時佐治對此有保留，不過他仍然相信Andrew。

Wham!首支成名作《Wake Me Up Before You Go-Go》的靈感便是來自Andrew寫給父母的字條，叫父母離開前叫他起床，可是他寫錯了「Wake Me Up Up」，如是便加多了一個「Go」，因此便成就了歌曲誕生。此後能言善辯的Andrew成為組合的發言人、幕後軍師，而佐治就專心創作，可是傳媒對佐治更加有興趣，希望知道他的事。隨着佐治變得更加有自信，因此他於1986年便宣佈作個人發展，展開人生另一頁。被飛起的Andew便去了當賽車手，不過未有起色，之後便重回樂壇用不同的筆名寫歌。

2016-12-26 19:52:00 HKT

黃志淙表現時身處夏威夷，昨日參與音樂會時，有人預告樂壇有一名巨星離世，但今日才知道是George Michael。(資料圖片)

黃志淙更希望2016年快點完結，因為今年西方樂壇相離世。(資料圖片)

George Michael(資料圖片)

(資料圖片)

(資料圖片)

(資料圖片)

樂評人黃志淙對於George Michael的離世感到很震驚，他在電話說：「真係好突然！我o依家喺夏威夷，其實收到嘅時間係聖誕日，噚日睇一個本地音樂會，已經有一個音樂人預告，佢有一個好重要音樂朋友離開咗，不過佢唔方便講住，全場都肅然，今日收到消息，原來就係George Michael，好得人驚！」

作為60後的黃志淙，見證着Wham!的走紅，他說：「《Careless Whisper》當時我讀緊高中，喺學校打碟就係打佢啲歌，啲人出晒嚟跳舞，好犀利，之後Wham!嚟香港，當時我讀大專一年班，走去排隊買飛睇佢，只係夠錢買山頂飛，唔知40蚊定80蚊，總之都要儲錢先買到，睇到佢live，覺得，嘩！魅力咁犀利。」

後來黃志淙加入電台工作，87年George Michael推出《Faith》，他讚嘆：「啲歌冧到好緊要，90年好多爵士味道同動人嘅歌，之後出得唔多碟，曾經停產，十年後又出番一張玩舊歌，算係少量產品但好大震撼力。佢係一個好率直嘅人，關於自己性取向，關於愛、和平，記得07年，佢曾出錢運送John Lennon彈《Imagine》嘅白色鋼琴，周圍去曾發生暴力衝突嘅地方，睇番網上消息，其中一站係甘迺迪（John F. Kennedy）遇刺地方，所以佢係一個好特別嘅人，想用音樂表達自己關於愛同和平嘅睇法。」

對於George Michael近年被官司、緋聞、炒作纏身，黃志淙坦言：「我覺得有少少可惜，但呢刻我哋都係記住佢喺音樂創作路上同青春偶像上嘅永恆，認定咗80年代嗰種跳脫，嗰時同香港我哋熟悉嘅哥哥（張國榮）好似，都係青春奔放不羈感覺。另一方面，佢嘅音樂才華做過好多慈善籌款。」

最後，黃志淙突然諗起一首聖誕歌《Jesus to a Child》，係George Michael個人發展後所作的歌曲，他說：「佢突然喺聖誕離開我哋，係一件令人覺得好奇妙好奇怪嘅事，但希望今年2016年好完喇，因為由年頭到David Bowie到Prince到Leonard Cohen到George Michael，其實有太多對我哋好重要好重要音樂人離開咗，好突然離開咗。」

2016-12-26 19:40:00 HKT

英國男歌手佐治米高於聖誕突然去世，終年53歲。

莎拉米雪姬娜於twitter大擺烏龍

莎拉以為同是80年代的英國歌手佐治童子去世。

佐治童子今日亦於twitter悼念佐治米高。

英國男歌手佐治米高（George Michael）於聖誕突然去世，終年53歲。佐治的死訊傳出後，現年39歲的美國女星莎拉米雪姬娜（Sarah Michelle Gellar）於twitter大擺烏龍，她於twitter表示：「你真的想傷害我嗎？我想你是的2016。#ripboygeorge，我是你的忠實粉絲。」莎拉以為同是80年代的英國歌手佐治童子（Boy George）去世，相當尷尬。網民即刻提醒莎拉，她之後立即更正，並指同樣傷心。

佐治童子今日亦於twitter悼念佐治米高：「有很多人愛他，我希望他知道，因為今日的悲傷是不能用言語形容。很悲痛。他擁有多麼美妙的聲線，他的音樂會繼續在世上為其才華作見證。我不能相信他已離開。希望佛祖會擁他在懷內。」

2016-12-26 19:20:00 HKT

（攝影：陳俊強）

吳國敬話入行第一次試音就係唱佐治米高嘅《Careless Whisper》

Patrick（左）話哥哥應該會為佐治米高嘅死而傷心

Ricky（左三）話女友唔喺香港，所以佢過咗個寂寞聖誕。

吳國敬同太極今日喺荃灣出席專輯宣傳活動，阿敬表示專輯銷情好好，遲啲仲會推出黑膠碟，佢仲透露明年3月，將會喺內地巡演，問佢係咪豬籠入水？阿敬話：「唔係計錢，我咁鍾意音樂，希望大家鍾意。」

講到聖誕節，太極表示各有各玩，主音之一嘅雷有暉（Patrick）笑住話：「噚晚冇飲，因為23號飲完飲到0依家。」鍵琴手Gary就透露同太太報佳音，覺得好有意思，佢話原本鄧建明（Joey）應承一齊報佳音，但因為佢自己忙住綵排，所以忘記通知Joey，Joey講笑咁話：「我仲諗住減少少罪孽。」至於鼓手朱翰博（Ricky）則指女友戴夢夢唔理佢，出咗埠玩，所以佢過咗一個寂寞聖誕。

對於英國著名歌手佐治米高（George Michael）離世，阿敬話：「佢係我偶像，我入行第一次試音就係唱《Careless Whisper》，我嘅唱腔都係模仿佢，佢嘅逝世反映咗一個咁有天才同才華嘅人，多數都係only the good die young，但無憾嘅，佢人生咁光輝，佢真係天才歌手，原先佢係戲院帶位員，唔係音樂出身，但可以去到過億張唱片，係一個不可多得嘅天才歌手，希望佢安息，我永遠懷念佢，我諗會有人搞懷念佢嘅演唱會，我會參與。」太極嘅結他手HiFi德話：「唔信，『吓！』囉。」Patrick就指哥哥係George Michael嘅fans，相信對方o依家喊緊。

英國一代巨星歌手佐治米高（George Michael）於聖誕節撒手人寰，消息震驚全球，中港台群星紛紛致哀，杜德偉於1987年將Wham!的《Where Did Your Heart Go?》改編成廣東歌《只想留下》，他接受《蘋果》電話訪說：「今個聖誕收到最難過消息，就係George Michael逝世，聽到時覺得好愕然，因為佢仲好年輕！」

佐治米高終年53歲，杜德偉認為對方仍可大有作為，他說：「o依家音樂世界有無限變化同發揮嘅時候，佢離開咗我哋，總係感覺佢喺音樂上可以仲有好多貢獻。自己由佢出道仲係Wham!樂隊已經聽佢嘅音樂，由佢第一隻single《Young Guns (Go For It!)》已經買咗嚟聽，一直到佢後期好多好歌《Wake Me Up Before You Go-Go》、《Last Christmas》、《Careless Whisper》，直至佢自己個人發展，佢嘅音樂都影響我成長，自己都翻唱過佢兩首歌，一首係《Careless Whisper》，一首係《Last Christmas》，命運安排佢喺聖誕節離開咗我哋，以後聽到佢嘅《Last Christmas》都會想念佢，唔會忘記佢音樂上嘅貢獻，佢嘅音樂會影響好多以後嘅音樂人。」

孫耀威昨晚才在卡拉ok唱過佐治米高的歌曲，想不到今日收到偶像離世消息，他在微博悼念：「你每一首歌的歌詞我都背得出來，my super idol George Michael…Thank you for your music and R.I.P. I love you always! 」

問當年有否佐治米高的紅館騷？老孫在電話說：「1985年嗰時冇睇，自己仲細，邊有錢喎！但由我識性開始聽歌，我已經好鍾意Wham!，跟住佢單飛我都好鍾意佢，以前讀書夾band全部都係夾佢啲歌，讀書參加學校歌唱比賽，全部都係唱George Michael啲歌，一直覺得佢係全世界最勁歌手，無論聲底、感情都係最正，噚晚喺卡拉OK先唱緊佢啲歌，所以好突然好難過，覺得一個咁有才華嘅歌手咁就走咗，好遺憾，我仲一廂情願等佢就嚟開live tour，我一定會去睇，點知已經冇機會，所以成朝聽佢啲歌，好唔開心！」

戴蘊慧亦在社交網留言致哀：「八十年代，第一盒cassette帶放入我的walkman的Wham!，幾乎天天loop的《Careless Whisper》...當我學編曲的第一首習曲，我選了《Kissing a fool》...George Michael，他一直陪我長大的，昨日就這樣離開了，好千萬千般千千的不捨得，首次為了一位我從不認得的人，流下了兩行眼淚，RIP,Miss you forever.」

2016-12-26 16:00:00 HKT

《南華早報》圖片

《南華早報》圖片

何嘉麗覺得黃金時期無論80年代香港、英國音樂，都好似慢慢隨風而逝。(資料圖片)

前港台DJ何嘉麗當年主持港台《三個小神仙》，1985年曾經去紅館睇過Wham!演唱會。

何嘉麗今日接受《蘋果》訪問話：「如果冇記錯，佢仲係好遲先開，嗰時開演唱會唔係好興唔準時，所以嗰時啲報紙傳媒都寫得幾緊要話佢好遲，但個氣氛係好開心，之前會有DJ出嚟打碟，搞到大家warm up晒然後出嚟唱，佢唔係唱好長，所以啲人話又遲開又唱得好少，好唔值錢，但我自己就好開心，佢成個過程由DJ打碟到出嚟唱到完，係冇冷場。同埋嗰時佢啲歌係好hit囉。」何嘉麗更表示當時的演唱會很精彩，Wham!唱出多首經典作品，包括他們第一首hit歌《Wake Me Up Before You Go-Go》。

問何嘉麗聽到又一個著名歌手離世會否感到震驚，她說：「係，尤其喺英國樂壇，英國樂壇對我自己影響比較深嘅，年頭嘅David Bowie，o依家12月尾又走埋George Michael，都幾可惜。不過都知George Michael之前身體唔係幾好，所以唔會好surprise，但佢啱啱喺Christmas逝世，而佢首歌叫《Last Christmas》，好無奈囉，最燦爛嘅時光消逝，黃金時期無論80年代香港、英國音樂，都好似慢慢隨風而逝。」