http://hk.apple.nextmedia.com/realtime/breaking/20150808/54064636
新一季英超今晚開鑼，雖然nowTV取得獨家轉播權，但唔少慳皮球迷近日全力搜挖平靚正的電視盒子、手機App、樂視、衛星等，務求以最少付出睇到最佳球賽，引發一場內地盒子圍攻收費電視大戰！《蘋果》走訪深水埗黃金商場，發現至少12款內地盒子充斥各店，更被店員譽為「足球直播神器」，記者買了其中3部熱賣盒子交專家進行大測試，發現畫面出現起格及延後情況，並不理想。
「除咗可以睇到英超，仲可以睇埋西甲、德甲、意甲同法甲，加埋其他起碼有200幾個台畀你睇。」黃金商場內的店員甫見有客人走近即大力硬推，更吹噓一盒在手，可盡覽五大聯賽賽事，全場多達12款的內地電視盒子，價錢由399元至2,500元不等。
「呢幾個月，每月賣成千幾部，呢排買，梗係攞嚟睇英超啦！」店員邊說邊示範其中一款盒子，畫面上的中外電視台多不勝數，不但必備內地中央1至12台，就連台灣所有電視台都搜攞到，體育頻道亦達數十個。據店員推介，新一代的盒子都可以通過wifi或插線方式上網；而去年世界盃最熱賣的小米盒子，今年已出到第3代，不過已風光不再，「小米好多時畀人block(封)，今年冇咁多人買啦！」
記者買了其中三款最熱賣盒子，交畀香港專業教育學院（青衣）電子及資訊工程系系主任趙炳權進行測試，過程中同時將3個盒子調至同一頻道播放足球節目，發現3個盒子都偶爾出現畫面起格，並在屏幕正中間彈出大個黑格「畫面加載中」，他直言：「起格往往係接收的訊號未夠，解碼後得部份畫面起格，到收齊嘢時畫面至穩定下來，收費電視台穩定好多。」
趙炳權坦言：「做測試時唔係直播英超，相對唔太多人同時睇都有呢啲問題，若果好多人一齊睇時，成功機會好成疑問。」他總結，所有球迷都想好順暢，一氣呵成睇完場波，若有任何技術失誤，就睇得無咁過癮。」他指網絡盒子穩定性成疑，表現不太可靠。
至於球迷又會點揀？有人稱堅持看收費電視台，亦有指試過用網絡盒子收看，但發現畫面延誤錯過入球及畫面起格。其中球迷蔡小姐稱：「試過上網睇，但delay分幾鐘，入咗波係朋友話我知，我要等多分幾鐘先睇到。」而球迷阿Joe亦指：「未用過網絡盒子，但若出現窒機或畫面起格，不能接受。」
