律師樓除咗律師，仲有好多 summer 同 winter students（即係暑假同寒假實習學生）騰來騰去，呢啲小朋友通常都係合夥人親朋戚友嘅仔女，大多數喺外國名校讀法律嘅高材生，畀父母「鼓勵」到律師樓攞經驗，冇人工收。呢啲小朋友從小就有父母用心栽培，個個文武雙全，但有時可以「離地」到令人啼笑皆非。就等我同你分享幾宗真人真事啦。
話說有次我同另一個律師要過澳門開會，叫埋個實習生 Mary 一齊去。去到信德，一行三人過櫃枱檢查船飛同身份證，我同另外個律師搞掂，行到去入境處櫃位，仲未見 Mary，回頭一望，佢仲企喺之前個櫃枱，於是我哋行返轉頭問佢做乜。佢話畀咗張卡個職員，但職員唔放行。
我哋立即鬧個職員，誰不知個職員面有難色咁話，佢 show 嗰張係 AE 黑卡呀！我忍住笑，即刻叫 Mary 出示身份證，點知佢話跌咗，未報失，仲要頂多句：「Daddy 話黑卡係身份象徵！」我望一望同行律師，跟住互反白眼，兼倒抽一口涼氣，掉低句 bye bye，趕船去了。
有個實習生 Nancy 仲搞鬼，有一次我約佢喺牛頭角港鐵站恒生銀行會合，再去見客。佢由中環出發，我諗佢最多咪45分鐘到，點知成個半鐘都未見人，電話又冇開，結果我冇等佢。夜晚佢打電話畀我道歉，話佢咁大個女第一次搭港鐵，兜來兜去都去唔到。典解嘅？因為之前都係由爸爸或司機接送，又或者搭的士……
又，話說有一年六四，我嘅一個律師朋友想收工後帶埋個喺外國返嚟做實習生嘅 Peter 去維園見識吓，但 Peter 着住套西裝，返屋企換又趕唔切，我朋友於是叫佢出去求其買件 T 恤、牛仔褲同便服鞋，方便坐球場。Peter 好快變身，仲 bling bling 地，鬼咁有 taste，我朋友好奇問佢去咗邊度買，Peter眼都唔眨話：「近近哋去咗附近間 Dior Homme 買，唔使兩萬蚊。」
對呢啲富學生，我從來冇投訴，因為我覺得每個人嘅出生都係命運安排，冇理由因為人哋有或者冇家底而歧視佢唧！講真我都有見過有富家子弟係有禮貌又有正義感兼腳踏實地，起碼佢哋唔會話去少啲日本，睇少場戲就買到樓囉！
當然唔係個個法律系學生都係藍血離地，我都見過唔少屋邨長大，放學趕去做幾份兼職嘅苦學生。唔好咁快播「寧願奮鬥到百千次，創出幸福快樂鄉……」住！其實佢哋同其他學生一樣，有啲成就出色，亦有啲經典過 Big Mac，所以話呢，睇嘢唔可以只睇表面，一個人對手嘅污漬、球員嘅膚色、五百萬／千二人嘅票等等，究竟有咩真正意義，真係要深層了解吓先好下定論。
安娜．查普曼 @ 法政匯思
法政匯「絲」－法律界「絲打」，脫下法律界最私密嘅絲襪，同大家赤裸裸 gossip 呢行嘅八卦趣事。