第一位係醫生N，在公營醫院做事，雖然工作繁忙，但薪水唔錯，去年初為人父，老婆在威爾斯醫院產嬰，全部使費係零，所以佢話：「我受納稅人薪水，自己又係納稅人，交稅快而準，天公地道吖！」
第二位係賓架H，佢在大銀行升上高職，是否高薪要由佢自己講。三年前H太在舊山頂道一間私家醫院生下千金，全部收費好似係七至八萬，今年另有朋友C太太在同一醫院產兒，埋單係十萬。本來賓架H嘅太太係預定咗近排往同一醫院產子嘅，點知發生小意外，連忙叫救護車送太太往伊利沙伯醫院搶救，好彩保得住，母子皆住在ICU幾日，現在冇晒事咯，母親健康正常，但寶貝仔就要定期到伊利沙伯檢查、護理。賓架H夫婦本來對公立醫院聽見就驚，有心理抗拒，但經此一役，兩人對伊利沙伯讚不絕口，認為公立醫院設備好，照顧病人無微不至，費用便宜到極。如果呢次意外在私家醫院發生的話，賓架H雖然不缺錢，但恐怕亦會覺得係一個長期負擔，故此佢兩位都覺得，稅係要交嘅，如果係為咗支持公立醫院嘅話。
朋友C太太產子，用咗十萬元，幾昂貴，現時私家醫生接生，幾乎係非開刀不歡，因開刀有時間預算，清楚知道一日可以做幾多單開刀手術，但自然順產咯喎，時間冇得計，有時可以拖足24小時，私家產科醫生聽見就皺眉頭。肥仔K就係第三位話交稅好抵嘅人，佢知道搵私家醫生到私家醫院係一項昂貴玩意，十個月前就決定到威爾斯醫院，呢呢，醫生計得準確，預產日子前兩日，肥仔K太太胎兒作動，晨早六時就入院，中午時份就誕下女兒，一切順利無比，只是大房內早已爆棚冇床位，要上一層樓入私家房兼且被勸諭次日就要出院，因床位緊張也，可見得公立醫院人多爭位，醫護人員又短缺，唯有趕人走。不過K太有少少燒，要求住多一日，結果兩日後出院，埋單計數，威院收幾多錢？250元，便宜到肥仔K唔信，佢搵架的士車老婆返屋企，來回車資已經係110元啦，於是佢猛話交稅係要交嘅，慳番近十萬元醫院費用，夠買奶粉養個女到兩歲斷奶咯！