睇之前補充翻一句，有樓住算好啦，呢個帖純粹就係預測景觀。(本身以為可以一次過寫嗮4棟出黎，但係寫成1w字數，所以就分成4個)

更著落嚟嘅兩個星期，我就會盡量幫大家分析一下各單位嘅景觀。有部分嘅新樓冇詳細嘅平面圖，我可能會參考同分區嘅平面圖黎參考下，我可能會幫d單位加號碼(號碼僅供參考，實際上可能會唔一樣)今次就先講白田d景觀先(下個帖應該係海榮，之後應該會係富輝匯智漁進)
先講翻啦，7,8期大部分單位預留俾9,10,11座居民，地盤位置係原本白田邨1,2,3座(位置圖) （今次隔行方便觀看，唔方便就反映下俾我）


先講詠田樓(順序1-16號單位)：
1-2號單位：全部單位向西(西斜問題請注意)，底層單位可能會有額外噪音問題(靠近平台，住落就知道有幾嘈)。景觀方面，主要會睇到13期地盤，平台(應該有籃球場同兒童遊樂設施)仲有康健心三棟樓，有可能會睇到嘉頓山。

3-4號單位：全部單位向東，由於隔離係10期地盤(噪音沙塵問題，維持2-3年)。景觀方面，主要會睇到10期地盤白田街盛田昌田樓。

5-6號單位：全部單位向北，由於隔離係10期地盤(噪音沙塵問題，維持2-3年)。景觀方面，主要會睇到10期地盤白雲街朗田樓(朗田樓有可能會被遮住)。

7-8號單位：全部單位向南，單位靠近白雲街所以底層單位可能會有額外噪音問題，我估計會係熱門單位之一。景觀方面，底層主要會睇到白雲街安田樓，中層單位就係安田樓同美葵美昌個頭(應該有數字樓嘅，仲有可能會被美益美賢樓擋住)，高層單位應該可以見到大埔道同深水埗一帶(應該就係黃金或者西九龍中心個頭，唔一定見到)。

9-10號單位：全部單位向東，單位靠近白雲街所以底層單位可能會有額外噪音問題。景觀方面，底層主要會睇到白雲街電訊盈科棟大廈，中層單位就係安田樓同偉智街個頭(賽馬會藝術中心都有可能睇到)，高層單位應該可以見到南昌街同石硤尾一帶(應該就係石硤尾服務大樓個頭，唔一定見到)。

11-12號單位：全部單位向西(西斜問題請注意)，單位靠近白雲街所以底層單位可能會有額外噪音問題。景觀方面，底層單位主要會睇到健田安田樓同學校群，中層同高層應該都會係健田樓嘉頓山。

13-14號單位：全部單位向南，單位靠近白雲街所以底層單位可能會有額外噪音問題，我估計會係熱門單位之一。景觀方面，底層主要會睇到白雲街安田樓，中層單位就係安田樓同美葵美昌個頭(應該有數字樓嘅，仲有可能會被美益美賢樓擋住)，高層單位應該可以見到大埔道同深水埗一帶(應該就係黃金或者西九龍中心個頭，唔一定見到)。

15-16號單位：全部單位向北，由於對面係13期地盤(噪音沙塵問題，維持3-4年)，底層單位可能會有額外噪音問題(靠近平台，住落就知道有幾嘈)。景觀方面，大部分單位主要會睇到13期地盤，平台(應該有籃球場同兒童遊樂設施)仲有康健心三棟樓(未來多幾棟睇咯)。


四棟入面揀邊幾棟？康田同健田樓，由於我係4人，所以不外乎C同D型單位咯，個人想揀康田樓高層01同12室，一唔係就健田高層01,11同12室。望我可以抽中前d嘅號碼揀先。

以下係剩下嘅link連接：
康田樓：http://cyclub.happyhongkong.com/viewthread.php?tid=270825
健田樓：http://cyclub.happyhongkong.com/viewthread.php?tid=270826
心田樓：http://cyclub.happyhongkong.com/viewthread.php?tid=270828