中環最老報販彩婆見證紙媒沒落：日本仔時期仲好生意
紙媒式微，手機新聞、網媒，驟變明日希望，貴為全港最老報販、84歲的區彩卻不言休，「我唔做，即係我上咗天囉」。由戰後派報童到紙媒開到荼蘼，一做73年。小小鐵板屋，見證蘭桂坊銳變、報業由實體走進虛擬世界，「以前冇咁多手機，又冇免費報紙，附近啲會計師樓、積樓都會訂報紙，點同家？」她也由阿彩變彩姐、再變成今日的彩婆：「呢啲報攤，做埋我呢代冇㗎喇。」記者：呂麗嬋
彩婆嗓門大，一頭白髮，小攤檔位於德己立街與威靈頓街交界的小斜路上，簡陋的鐵皮小報攤，映照人來人往的中環，蹲在小凳，已是獨有城市風景，「以前業豐（大廈）最多公司訂報；仲有隔籬蓮香、陸羽，邊個唔係攞份報紙歎茶？」由開埠初期到戰後經濟起飛，中環是大小報章的根據地，曾有9份駐足荷李活道，堪稱報業發源地。
「《華橋日報》、《紅綠日報》，以前《大公》、《文匯》，都喺呢頭，日治年代飛機大炮，要搵食報攤照開，最多唔對路跑去華人行避一避」。戰後出生的區彩，是第一代報販，殖民年代的中環，沒今日熱鬧，雲咸街和威靈頓街，是貧富分水嶺。富人經雲咸街上半山，貧窮華人就拐入威靈頓街，走進唐樓板間房，稍有能力就做包租。而彩婆就是戰後最典型的底層勞苦大眾。
由2仙份賣到7元
「爸爸早死，同阿媽相依為命，嗰個年代嘅女人唔輕易改嫁，啲街坊見你寡母婆同情你，畀幾份報紙你攞住喺街叫賣，賺到幾個仙，已好開心」。一份報紙，她由2仙賣到今日7元，當年目不識丁的報童與報紙結下不解緣，「初時冇固定檔口，邊行邊叫賣，到16歲有錢搭個排檔，申請小販牌，由11歲做到84歲，做咗70幾年」。
那個年代生活簡單，住在和安里，檔口在一街之隔的德己立街。「以前叫德忌笠街，又忌又笠，唔好意頭先改名。我喺中環都住過4個地方，由和安里搬去威靈頓街，加租就搬，窮人邊有得揀？」丈夫在中環做裁縫，育3子1女，年前獲派石排灣公屋，每日仍得坐1小時巴士到中環開檔，「唔嚟唔安樂，以前伯爺公同我一齊開檔，幾個月前走咗，好在新抱幫手，唔係邊夠力開閘」。
站在一旁的Winnie，正是彩婆口中的乖媳婦。家住西環，每日清晨5點趕頭班車叠報紙開檔，「我成日喺度做，連最低工資都賺唔到，你哋《蘋果》一日賣唔到10份，以前攞100份，放喺地下半個人咁高，7、8年就變到咁。今朝發行先送得4份嚟，回紙回得多，第2日又送少啲。家買報紙嘅，都係5、60歲嗰班，有客日日買份《成報》，話要睇到執笠為止」。
歷92年人踩人慘劇
長情讀者買少見少，就如她這個跟得媳婦一樣罕見。「做到下午1、2點就收，有時奶奶唔捨得，但我真係太攰，會催佢走，志在出嚟見吓老街坊，以前佢同老爺兩個做，剩番一個，鬱喺屋企好易病，唔係我偉大，係病咗要人照顧我仲大鑊！」媳婦說。報攤毗鄰蘭桂坊，最多悲歡離合。醉倒街頭少女、步出酒店眼神茫然的OL、1992年人踩人慘劇……小小鐵皮屋見證香港悲傷一夜。
「廿幾年前，盛智文未將蘭桂坊發展成為酒吧區，度一過7點好似死城，家夜夜笙歌」。彩婆謂不大懂欣賞璀璨夜中環，倒是悲劇一刻，記憶猶新，「以前個舖得啲鐵絲網圍住，逢除夕倒數人多，個檔一定俾人推冚」。那一夜，一家人總動員護檔，「好多抬出嚟已經奄奄一息放喺地下，到處都係喊聲，你問我，我梗係鍾意以前多啲，但個世界要變，有乜辦法」。
歡樂香江
幸運星
回應 
