網民熱話：牆身發霉要租客負責？

folee0001

網民熱話：牆身發霉要租客負責？

【on.cc東網專訊】而家買樓難就係人都知，但原來而家租樓都「難」處！近排日日啲天氣都咁潮濕，唔少人屋企都可能會有牆身發霉嘅問題，仲有人屋企濕到生埋菇！

有業主就係因為牆身發霉，喺討論區內開post呻下：「租客唔知點住，多幅牆身勁發霉，大家評下理。」佢仲話，要求扣租客兩萬蚊做油漆費。點知個租客同佢講喺小額見。咦？乜原來而宜家油下油都要盛惠二萬蚊啦！

不過，一眾嘅網民似乎冇乜幾個企喺發帖者嗰邊喎。有網民直言：「你呢類人我見唔少 ，以為有錢大曬！」發帖者補充話：「佢（租客）話潮濕唔關佢事」隨即就被人反駁，「點解你認為關佢事？」

其後發帖者又解釋，覺得牆身發霉唔係自然損耗，因為租客冇抹牆，又唔用抽濕機。網民就回應指：「你租約有規定佢要抹牆同（用）抽濕機？定係包咗抽濕機及肯畀電費？」「無用抽濕機，最多只係講緊無防止牆身發霉（租約上佢冇此義務），唔係佢令牆身發霉。」呢位網民就更加一語中的：「你去酒店住一個星期，個牆霉左，你會唔會油返好佢？輸打贏要，租金、按金就個個月識拎。」

諗落都幾有道理，究竟點樣先可以人為令牆身發霉呢？不如發帖者自己抹一抹，清返啲霉咪算囉！

同時，亦有好心人提一提發帖者：「租俾人就預左跌返啲，執執（再）畀下家，嘢嘢去到咁盡，小心報應啊！」「不如當今次係一個教訓。以後調整返租金，作為維修保養用。」

身為業主嘅發帖者，應該都聽下人哋嘅意見啦。如果唔係，咁樣屈一屈，會唔會太離地啊？

lomeion

我幅牆爛哂，我都驚業主啊支啊助！

jp_dannywong

我以前租過三個地方都係由業主負責油返~  有一度仲幫我油咗先再續約添~

tinlingyuetka

?