攝影:葉君海
現場有噴煙營造仙氣效果,Vivian就更加有仙女感覺。(蘋果日報)
呢位仙女11月就「入五」,下年1月底開演唱會。(蘋果日報)
Vivian邀請咗王馨平、湯寶如做嘉賓,有機會再唱番《美少女戰士》。(蘋果日報)
(蘋果日報)
玉女掌門人周慧敏(Vivian)即將喺11月踏入50歲,眨吓眼已經入行30周年,為紀念呢個特別日子,將會喺下年1月假紅館舉行「一萬天荒愛未老」演唱會,今日Vivian喺圓方出席記者會,大會喺現場噴煙營造仙氣效果,令Vivian好似仙女咁出場,大會又宣佈加開1場共3場演唱會。
30周年咁大件事,Vivian獲多位猛人出力撐,包括騷名係俞琤改,林海峰就幫手影海報,古巨基做演唱會總監,Vivian話:「海報手上有汽水蓋拉環,自己冇問林海峰,但覺得有那些年感覺。」早前Vivian、王馨平、湯寶如合體亮相大台節目唱歌,可惜冇唱到飲歌《美少女戰士》,原來佢哋早有預謀,Vivian已經請咗兩人做嘉賓。
問到《美少女戰士》會唔會變身?Vivian話:「其實之前一直唔講,諗住有神秘感,佢哋好爽快答應,好想搵佢哋重現經典,唔想即興表演,要設計啲衫,總之要有型同cool啲。」會唔會有其他嘉賓?佢表示:「都會邀請其他嘉賓,嚟嘅朋友都係錫我嘅人,畢竟30年,但唔會好多,因為rundown要唱好多歌,自己都唱唔完,同埋要睇網上歌迷留言反應,睇吓佢哋建議我唱乜嘢歌,到時再揀。」
上次Vivian開騷,老公倪震扮豹貓上台製造驚喜,問到老公今次會唔會上台呢?Vivian笑笑話:「之前已經畀過一次驚喜我,唔使再畀驚喜,上次以為我係最後一次演唱會,點知唔係最後一次,老公都係適宜做觀眾,我已經好開心,其實佢唔阻止我,已經係最大支持。」
Vivian坦言平時有乜都會搵老公商量,但做呢個騷唔係咁敢同佢講:「佢覺得我去到呢個時候,應該輕鬆、冇壓力同玩嘅形式去做,等紅館批檔期之餘,都要等佢批,我應承咗佢呢次做騷會好enjoy,因為唔知會唔會有下一次演唱會,年尾我已經50歲,做得一次得一次,令到喜歡我嘅人鍾意睇就得,因為唔知自己仲有冇魄力。」